न्यायाधीशहरू त दलगत आधारमा नियुक्त हुने मुलुकमा राष्ट्रपतिबाट दल निरपेक्ष भूमिका खोज्नु आफैँमा मूर्खतापूर्ण कार्य हो

केशवप्रसाद भट्टराई ।
१. सम्माननीय राष्ट्रपति दृढ इच्छाशक्तिको स्वामी हुनुहुन्छ । राष्ट्र र प्रजातन्त्रप्रतिको उहाँको निष्ठा अविचलित छ । सर्वोच्च अदालतका न्यायाधीशहरू त दलगत आधारमा नियुक्त हुने मुलुकमा राष्ट्रपतिबाट दल निरपेक्ष भूमिका खोज्नु आफैँमा मूर्खतापूर्ण कार्य हो । त्यसैले राजनीतिक दलको उम्मेदवार भएर राष्ट्रपति भएको व्यक्तिबाट हाम्रो जस्तो मुलुकमा दल निरपेक्ष र निष्पक्ष भूमिकाको अपेक्षा नगरौँ । पूर्व राष्ट्रपति र वर्तमान राष्ट्रपति दुवैबाट त्यस्तो निष्पक्ष र दल निरपेक्ष भूमिका सम्भव नभएकै हो ।

२. तर भन्नैपर्ने कुरो के हो भने सम्माननीय राष्ट्रपतिजीहरूको को सल्लाहकार भनेको सरकार नै हो । सरकार मात्रै हो । सरकार राष्ट्रपतिजीको एक मात्र प्रवक्ता हो । राज्यका जुन सुकै निकायसँग राष्ट्रपतिले परामर्श चाहे पनि सरकार मार्फत मात्रै लिने हो । राष्ट्रपतिजी सरकार र संसद मार्फत मुलुकप्रति उत्तरदायी हुनुहुन्छ ।

३. राष्ट्रपतिजीका सल्लाहकारहरूलाई संविधानले चिन्दैन । उनीहरू राष्ट्रपतिजीका निजी सहयोगी हुन् । उनीहरूले बोलेका हरेक कुरा राष्ट्रपतिको विचार भनेर बुझिन्छ र बुझ्नु पर्दछ । त्यहाँ निजी हैसियत हुँदैन । त्यसैले सल्लाहकारहरूले सल्लाहकारकै हैसियतमा मिडियामा आएर सरकार र दलहरूसँग पाखुरा सुर्किने अधिकार राख्दैनन् । नागरिकको हैसियतमा त्यो अधिकार प्रयोग गर्न उनीहरू राष्ट्रपतिको सल्लाहकारको पद छोडेर आउनु पर्दछ । राष्ट्रपतिजीले पनि आफ्ना सल्लाहकारहरूलाई शिखण्डी बनाएर त्यसरी पाखुरा सुर्किनबाट रोक्नु पर्दछ ।