‘भोटै माग्ने भनिकन तिनै आउलान् होस गर्नू’
आमाको सन्देश
आओ प्यारा सब जनहरू साथ मेरो समाओ
आओ मेरा मुटु मनहरू फूर्ति डाकेर आओ
जैल्यै झेली कपट जनका साथ छोडेर आओ
आओ नाच्दै छमछम गरी देशका निम्ति आओ (१)
भित्रै काला कथित शिरका मार्ग त्यागेर आओ
नेता भन्ने पतित तहका हान घैँटो फुटाओ
धिक्कारे ती कलुष मनका शत्रु हुन् जो जताओ
एक्लै पारे अब मनुज ती छैन नाता बताओ (२)
नेपालीको रगत पसिना सोस्छ खाँदै डकार्छ
नेपालीकै निद हरण भो व्यर्थमा ऊ हकार्छ
त्यस्ता नेता पछि पछि बसे जिन्दगी लाग्छ घाऊ
“मारो गोली” भनिकन स्वयं सिर्जना गर्न आओ (३)
सारा मान्छे थकित अब छन् चाल राम्रो नदेखी
आओ आजै सबल घटना हुन्न आफैं नलेखी
भेट्ना साथै सकल जनले कान तानी समात
खाल्डो खन्दै खुरुखुरु पुरे देशद्रोही जमात (४)
भोटै माग्ने भनिकन तिनै आउलान् होस गर्नू
राख्नू भाटा सब घरघरै हान्नू कैल्यै नडर्नू
आमा तिम्री हरदम यही देशको निम्ति मर्छिन्
अत्याचारी अब गिंड भनी कालको रूप धर्छिन् (५)
मनप्रसाद वाग्ले ।
