प्रधानमन्त्रीज्यू, मास्कमा नेपालको झण्डा राखेर राष्ट्रवादी भइँदैन
सम्माननीय प्रधानमन्त्रीजी
तपाईँले लगाउने मास्कमा झन्डा राखेर तपाईँले आफू राष्ट्रवादी भन्ने सन्देश दिन खोजेको देखें । मास्क या टोपी या दौरा सुरुवालमा नेपालको झन्डा राखेर राष्ट्रवादी भइँदैन । यदि तपाईंले आफूलाई राष्ट्रवादी भन्ने हो भने हाललाई निम्न बमोजिम गर्नोस् :
(१) सरकारी प्रशासन, शिक्षण संस्थानहरु, न्यायालय तथा संवैधानिक अंगहरुमा नातावाद , कृपावाद, भागबण्डा र दलीयकरणलाई हटाउँदै क्षमता र उत्कृष्टतालाई लागू गर्ने मान्यता कठोरताका साथ लागू गर्नोस् ।
(२) दिन दहाडै हवाइजाहजदेखि औषधि किन्नेसम्ममा भ्रस्टाचार र लुट गर्ने तपाईंका सहयोगीहरुलाई कानुनको दयारामा ल्याउने नैतिक साहस र इमान्दारी देखाउनुस् ।
(३) देशमा तपाईंको पार्टी र अन्य पार्टीका उच्चा नेताहरुको सम्पत्ति जाँच गर्ने राष्ट्रिय आयोग घोषणा गर्नुस्
(४) आफूले पुरा गर्न नसक्ने या नजानेको कुरामा धेरै गफ नहाँक्नुस् । बेसार पानीले कोरोना भाग्छ भन्ने जस्ता कुरा गरेर देशको प्रधानमन्त्रीलाई हाँसोको पात्र नबनाउनुस् ।
(५)राष्ट्रियता मास्कमा छापेको झण्डामा होइन कोभिडको इमान्दारी र कुशल व्यबस्थापनमा देखिनु पर्यो , कोभिड पीडित जनतालाई राहतमा देखिनुपर्यो, भ्रस्टाचारमाथि कठोर कारबाहीमा देखिनु पर्यो , आर्थिक अनुशासनमा देखिनु पर्यो, सरकारी न्यायमा देखिनु पर्यो । कृपया नेपाली झण्डालाई सस्तो प्रयोग नगर्नुस् ।
डा. प्रकाशचन्द्र लोहनी, अध्यक्ष राप्रपा
