नारायणकाजीलाई विष्णु रिमालको चेतावनीः ‘नेताहरूलाई गुटवन्दीको आगोमा पोल्न उत्तोलक नबन्नुहोस् !’
काठमाडौं । प्रधानमन्त्री केपी शर्मा ओलीका प्रमुख राजनीतिक सल्लाहकार विष्णु रिमालले नेकपाका प्रवक्ता नारायणकाजी श्रेष्ठलाई प्रवक्ता पदको लाज जोगाउन आग्रह गरेका छन् ।
रिमालले शुक्रबार ट्विटरमार्फत प्रवक्ता श्रेष्ठलाई पार्टी विरोधी गतिविधि गरेको आरोप लगाउँदै प्रवक्ता पदको लाज जोगाउन आग्रह गरेका हुन् ।
रिमालले लेखेका छन्, इनफ इज इनफ नारायणकाजी श्रेष्ठ प्रकाश जी ! कम से कम पार्टी प्रवक्ता पदको लाज त जोगाउनुस् । ‘बिधि र पद्दति’को नक्कली गीत गाउँदै नेताहरूलाई गुटवन्दीको आगोमा पोल्न उत्तोलक नबन्नुहोस् ! पार्टी एकता बिरूद्धका कुनैपनि गतिबिधि कतैबाट पनि नहोस् !! मुलुक संवेदनशील मोडमा छ महसूस होस्!!!
बुधबार पार्टी अध्यक्ष पुष्पकमल दाहाल प्रचण्ड, वरिष्ठ नेताद्वय माधवकुमार नेपाल र झलनाथ खनाल तथा प्रवक्ता नारायाणकाजी श्रेष्ठले पत्रकारको गोप्य भेला बोलाएपछि पार्टीको आन्तरिक द्वन्द्व बढ्दै गएको छ । नेताहरु एकले अर्को पक्षकालाई सामाजिक संजालमार्फत आरोप प्रत्यारोपमा लगाउनमा व्यस्त हुन थालेका छन् ।
