नेकपाको सचिवालय बैठक पनि निष्कर्षबिहीन

काठमाडौं । पार्टीभित्र देखिएको विवाद समाधानका लागि छलफल गर्न बसेको सत्तारुढ दल नेपाल कम्युनिस्ट पार्टीको सचिवालय बैठक निष्कर्षबिहीन भएको छ । शनिबार बसेको सचिवालय बैठकमा पनि कुनै सहमति जुट्न नसकेको प्रवक्ता नारायणकाजी श्रेष्ठले जानकारी दिए । बैठकमा पार्टीको आन्तरिक विवाद कसरी हल गर्ने भन्ने विषयमा छलफल गरेको उनले बताए ।

उनले सचिवालय बैठकमा पार्टी एकतालाई रक्षा र सुदृढ गर्ने र जनादेश बमोजिम काम गर्ने गरी थप छलफल गर्ने सहमति भएको बताए । प्रवक्ता श्रेष्ठले आइतबारका लागि बोलाइएको स्थायी समितिको बैठक तोकिएकै समयमा बस्ने सहमति भएको जानकारी दिए । बैठकअघि नेकपा अध्यक्षद्वय केपी ओली र पुष्पकमल दाहाल प्रचण्डबीच छलफल भएको थियो । नेकपामा ओलीको प्रधानमन्त्री पदबाट राजीनामा मागेपछि विवाद चूलिएको हो ।