एमसिसीको ‘च्यालेन्ज’
काठमाडौं । सत्तारुढ नेपाल कम्युनिष्ट पार्टी नेकपाको स्थायी कमिटीको बैठक थप एक दिन लम्बिएको छ । शनिबार पार्टी मुख्यालय धुम्बाराहीमा बसेको बैठकमा अध्यक्ष पुष्पकमल दाहाल प्रचण्डले स्थायी कमिटी सदस्यहरुले उठाएका प्रश्नको जवाफ दिएका छन् ।
आइतबार सुरु भएको स्थायी कमिटी बैठकमा अध्यक्ष प्रचण्डले राजनीतिक प्रतिवेदन र महासचिव विष्णु पौडेलले विधान संशोधन प्रस्ताव पेश गरेका थिए । बिहीबार स्थायी समितिका सदस्यहरुले बोल्ने क्रम सकिए पनि बैठक शुक्रबार नबसी शनिबार बसेको हो ।
साता लामो बैठकमा अधिकांश स्थायी कमिटी सदस्यहरुले सरकारको कामको ्आलोचना गरेका समाचार बाहिर आएको थियो । सदस्यहरुले जनतामा छाएको निराशा, पार्टी एकलौटी ढंगले निर्णय गर्ने प्रवृत्तिले पार्टी चल्न नहुने भन्दै नेतृत्वलाई सुझाव दिएका प्रवक्ता नारायणकाजी श्रेष्ठले जानकारी दिए ।
बैठकमा अध्यक्ष प्रचण्डले पेश गरेको प्रतिवेदनमाथि सुझावका आधारमा परिमार्जन, विधान संशोधनबारे थप स्पष्ट पार्न समय आवश्यक परेकोले बैठक आइतबार फेरि बस्ने प्रवक्ता श्रेष्ठले बताए ।
स्थायी कमिटी सदस्य भीम रावलले अमेरिकी सरकारले दिने भनेको मिलिनियम च्यालेन्ज कर्पोरेशन मार्फतको सहयोग बारे पार्टी र सरकारले जनतालाई स्पष्ट पार्नुपर्ने बताए । प्राप्त हुने सहयोग अमेरिकी इन्डो प्यासिफिक रणनीति अन्तर्गत हो भने तत्काल रोक्न आफूले माग गरेको बताए ।
