पोखराबाट त्रिभुवन अन्तर्राष्ट्रिय विमानस्थलमा सिचुवान एयरको प्रवर्द्धनात्मक उडान
कास्की। पोखरा अन्तर्राष्ट्रिय विमानस्थलदेखि काठमाडौँको त्रिभुवन अन्तर्राष्ट्रिय विमानस्थलमा सिचुवान एयरलाइन्सको विमानबाट बिहीबार प्रवर्द्धनात्मक उडान गरिएको छ।
पोखराबाट प्रदेश सरकारका उद्योग तथा पर्यटनमन्त्री मित्रलाल बस्याल, उच्च पदस्थ कर्मचारी, पर्यटन व्यवसायी तथा सञ्चारकर्मीसहित एक सय २६ यात्रु बोकेर ‘एयरबस ३१९’ काठमाडौँ अवतरण गरेको हो।
यसअघि बिहान चीनको छेन्दुबाट १२९ यात्रु बोकेर पोखरा अवतरण गरेको सिचुवान एयरलाइन्सले पोखराबाट यात्रु बोकेर काठमाडौँ उडान भरेको हो। यससँगै पोखरामा पहिलोपटक एयरबस पूर्ण क्षमतामा उडान र अवतरण भएको छ।
प्रवर्द्धनात्मक उडानपछि त्रिभुवन विमानस्थलमा आयोजित पत्रकार सम्मेलनमा नेपाल नागरिक उड्डयन प्राधिकरणका महाप्रबन्धक प्रदीप अधिकारीले पोखरा विमानस्थलबाट विमानहरूलाई अन्तर्राष्ट्रिय उडान अवतरणमा कुनै समस्या नरहेको बताए।
विमानस्थलको धावनमार्ग र नजिकको डाँडाका कारणले ठूला आकारका जहाज सञ्चालनमा समस्या हुने दाबीलाई प्रवर्द्धनात्मक उडानले गलत साबित गरेको बताए। “पोखरामा एयरबस जुनसुकै राम्रोसँग उडान र अवतरण गर्न समस्या छैन भन्ने पुष्टि भएको छ। अब नियमित अन्तर्राष्ट्रिय उडान सञ्चालनका लागि सरकारी र निजी क्षेत्रको सामूहिक पहल आवश्यक छ” उनले भने। अधिकारीले सरकारले अर्बौँ लगानी गरेर पूर्वाधार तयार गरेकाले विमानस्थल सञ्चालनका लागि निजी क्षेत्रले समेत अग्रसरता लिनुपर्ने बताए।
नेपाल टुर्स एन्ड ट्राभल्स एजेन्टस् एसोसिएसन (नाटा) गण्डकीका अध्यक्ष किशोर दाहालले पोखरा विमानस्थलबाट अन्तर्राष्ट्रिय उडान नहुँदा पर्यटन क्षेत्र मारमा परेको बताए। प्रवर्द्धनात्मक उडानले पोखरामा ठूला आकारका जहाज उडान र अवतरणमा कुनै पनि समस्या नरहेको स्पष्ट भएको उनले बताए।
पोखरा पर्यटन परिषद्का अध्यक्ष तारानाथ पहारीले सरकारले छिमेकी देशहरू तथा खाडी मुलुकहरूमा अन्तर्राष्ट्रिय उडानका लागि पहल गर्नुपर्ने बताए। पहारीले भने, “अन्तर्राष्ट्रिय उडान अहिलेसम्म सञ्चालन नहुँदा विमानस्थललाई हेरेर लगानी गरेका पर्यटन व्यवसायी समस्यामा छौँ। ठूलो धनराशि खर्च गरेर बनाएको विमानस्थल व्यावसायिक सञ्चालन हुनुपर्दछ। सरकारले अन्तर्राष्ट्रिय उडानका लागि पहल गर्नु आवश्यक छ।”
पोखरा अन्तर्राष्ट्रिय विमानस्थल चीन सरकारको सहुलियतपूर्ण ऋण सहयोगमा निर्माण गरिएको हो। विमानस्थल विसं २०७९ पुस १७ गते उद्घाटन भए पनि हालसम्म नियमित अन्तर्राष्ट्रिय उडान हुन सकेको छैन। यहाँका पर्यटन व्यवसायी तथा निजी क्षेत्रले अन्तर्राष्ट्रिय उडान नियमित रूपमा सुरु गर्न सरकारसँग निरन्तर माग गरिरहेका छन्। विमानस्थलमा कहिलेकाहीँ चार्टर उडान भए पनि व्यावसायिक उडान हुन सकेको छैन।
