फेरि बढ्यो सुनको मूल्य, तोलाको एक लाख ४ सय रुपैयाँ

काठमाडौं । नेपाली बजारमा सुनचाँदीको भाउ मगलबार फेरि बढेको छ । गत साता तोलाको एक लाख नाघेर क्रमिक ओरालो लागेको सुनको मूल्य मंगलबार तोलामा एकैदिन २ हजार २ सय रुपैयाँ बढेर तोलाको एक लाख ४ सय रुपैयाँ निर्धारण गरिएको नेपाल सुनचाँदी व्यवसायी महासङ्घले जनाएको छ ।

सोमबार तोलामा दुई सय रुपैयाँ घटेर सुन तोलाको ९८ हजार २ सय रुपैयाँमा कारोबार भएको थियो । गत शुक्रबारको तुलनामा सोमबारसम्म ४०० रूपैयाँ घटिसकेको थियो। गतसाता तोलाको १ लाख २ हजार ६०० रुपैयाँसम्म पुगेको थियो।

यसैगरी चाँदी पनि अघिल्लो दिनको तुलनामा ६५ रूपैयाँ बढेर मंगलबार प्रतितोला १ हजार ३ सय ८० रूपैयाँ भएको छ । सोमबार चाँदी तोलाको एक हजार ३ सय १५ रुपैयाँ थियो ।