उत्पादनशील क्षेत्रमा लगानी बढाउने गरी बजेट ल्याउन अर्थविदको सुझाव
काठमाडौं । अर्थविदहरुले रोजगारीमा लगानी बढाउने गरी बजेट ल्याउन सरकारलाई सुझाव दिएका छन् । बिहीबार बसेको संसदको अर्थ समितिको बैठकमा उनीहरुले आगामी बजेटमा खर्च कटौती गरी रोजगारीमा लगानी बढाउन सरकारलाई सुझाव दिएका हुन् । त्यस्तै उनीहरुले उत्पादनशील क्षेत्रमा लगानी बढाउन पनि सुझाव दिएका छन् ।
बैठकमा अर्थविद् चन्द्रमणि अधिकारीले रोजगारी सिर्जना गर्न कृषिलाई व्यवसायीकरण गर्नुको बिकल्प नरेहेको बताए । उनले लकडाउन हुने पूर्वसंकेत पाउँदा पनि सरकारले त्यसको तयारी नगरेका कारण अर्थतन्त्रमा समस्या देखिएको बताए । अर्थविद् डा. शंकर शर्माले प्रधानमन्त्री रोजगार कार्यक्रमलाई प्रभावकारी रुपमा अघि बढाउनुपर्ने धारणा राखे ।
राहत र रोजगारीको कार्यक्रमलाई बजेटले प्राथमिकतामा राख्नुपर्ने उनको भनाई छ । अर्थविद् विश्वम्भर प्याकुरेलले पर्यटन क्षेत्र, मेघा सिटी लगायतका कार्यक्रमहरुलाई यस पटक निरन्तरता दिन नहुने बताए ।
छलफलमा अर्थविद् डा. डिल्लीराज खनालले अर्थतन्त्रलाई चलायमान बनाउन खर्चमा आधारित बजेट प्रणालीलाई नतिजामा आधारित बनाउनुपर्ने तथा विभिन्न प्रकारका बोर्डहरु खारेज गरी खर्च कम बनाउनुपर्ने बताए ।
