एसीसीए नेपाल र एनसीए कलेज अफ मेनेजमेन्टको आयोजनामा तीन जिल्लाका ८० शिक्षकलाई तालिम

काठमाडौं । एसीसीए नेपाल र एनसीए कलेज अफ मेनेजमेन्टको संयुक्त आयोजनामा असार ८ गते शनिबार मोरङको विराटनगरमा कोशी प्रदेशका तीन जिल्लाका शिक्षकहरुलाई तालिम दिइएको छ ।

कोशी प्रदेशका, मोरङ, सुनसरीका ११ र १२ कक्षामा तथा वीवीए तथा वीवीएसमा लेखा विषय अध्यापन गराउने ७० वटा कलेजका ८० शिक्षक/शिक्षिकाहरुलाई हाल परिवर्तित पाठ्यक्रममा समावेश गरिएको केही नयाँ पाठ्यसामग्रीलाई समेत मध्यनजर गरी Certificate in International Financial Reporting Standard  सम्वन्धी तालिम दिइएको हो ।

कार्यक्रमको उद्घाटन सत्रको अध्यक्षता एनसीए कलेजका अध्यक्ष सुरेश पण्डितले गरेका थिए र आयोजक एसीसीए नेपाल प्रमुख रविन कटवालले उपस्थित प्रमुख, विशिष्ठ एवम् अतिथिहरु र तालिममा सहभागी शिक्षकहरुलाई स्वागत गर्दै कार्यक्रमको उद्देश्य र महत्व माथि प्रकाश पारेका थिए ।

साथै अतिथि महानुभावहरुलाई मायाको चिनो प्रदान गरेका थिए । कार्यक्रममा पुर्वाञ्चल विश्वविद्यालयका उपकुलपति प्रा.डा. विजुकुमार थपलियाले पानसमा बत्ती बाली कार्यक्रमको उद्घाटन गर्दै कार्यक्रमलाई सम्बोधन गरेका थिए ।

त्यसैगरी मदन भण्डारी स्मृति प्रतिष्ठानका कार्यकारी निर्देशक प्रा.विनोद अर्याल, सुन्दरहरैंचा नगरपालिकाका प्रमुख केदार प्रसाद गुरागाई, हिसानका केन्द्रीय उपाध्यक्ष भेषराज पोखरेल, राष्ट्रिय परीक्षा बोर्ड विराटनगरका प्रमुख जीवन गड्तौला, एनप्याब्सन कोशी प्रदेशका सभापति राजन पौडेल र नेपाल राष्ट्रिय शिक्षक संगठन झापाका अध्यक्ष द्रोणबहादुर श्रेष्ठले कार्यक्रमको सफलताको शुभकामना दिएका थिए ।

कार्यक्रममा मोरङ,सुनसरी र झापा जिल्लाका हिसान, प्याब्सन, एनप्याब्सन र विभिन्न शिक्षक संगठनका अध्यक्षहरुको पनि उपस्थिति थियो । कार्यक्रमलाई सम्वोधन गर्दै प्रमुख अतिथि एवम् पूर्वाञ्चल विश्वविद्यालयका उपकुलपति प्रा.डा. विजुकुमार थपलियाले नेपालको सन्दर्भमा International Financial Reporting Standard  को महत्व बताउँदै शिक्षाका बारेमा नयाँ शिराबाट बहस आबश्यक रहेको बताएका थिए ।

त्यसैगरी मदन भण्डारी स्मृति प्रतिष्ठानका कार्यकारी प्रमुख प्रा. विनोद अर्यालले एसीसीएको विश्वव्यापी लोकप्रियताको बारेमा उल्लेख गर्दै यसका बारेमा शिक्षा क्षेत्रमा कार्यरत सबैले जानकारी लिनु पर्ने सुझाव दिए । राष्ट्रिय परीक्षा वोर्ड बिराटनगरका प्रमुख जीवन गड्तौलाले राष्ट्रिय परीक्षा बोर्डले हाल सालै कक्षा ११ र १२ को पाठ्यक्रम परिर्वतन गरेको सन्दर्भमा यो तालिम अत्यन्तै सान्दर्भिक र उपयोगी रहेको बताए ।

एनसीए कलेजले नेपाली विद्यार्थीलाई विगत २० बर्ष देखि निरन्तर रुपमा गुणस्तरीय एसीसीए व्यावसायिक शिक्षा प्रदान गर्दै आएको छ भने सन् २०१० मा कलेजको अध्ययन/अध्यापनको गुणस्तर मापन गरी द एसोसिएसन अफ चार्टर्ड सर्टिफाईड एकाउन्टेन्स्ले Approved Learning Partner÷GoldApproved Learning Partner-Gold को मान्यता पाएको छ । शिक्षा मन्त्रालयबाट एसीसीए तयारी कक्षा सञ्चालन गर्न स्वीकृत प्राप्त गर्ने यो नेपालको पहिलो कलेज हो भने एसीसीए बेलायतको The Association of Chartered Certified Accountants, UK  द्वारा सञ्चालित चार्टर्ड एकाउन्टेन्सी कोर्स हो ।

एक दिने तालिममा कर्ण थापाले प्रशिक्षण दिएका थिए भने एसीसीए कोर्स र एनसीए कलेजका बारेमा अध्यक्ष सुरेश पण्डितले जानकारी दिएका थिए । कार्यक्रमको अन्तमा राष्ट्रिय परीक्षा वोर्ड विराटनगरका प्रमुख जीवन गड्तौलाले सहभागीहरुलाई प्रमाणपत्र वितरण गरेकाथिए । कार्यक्रमको संयोजन र संचालन शिक्षाविद् नारायण आचार्यले गरेका थिए ।