भ्रष्टाचार मुद्दामा चन्द्रागिरि–२ का वडाध्यक्ष तामाङ दोषी ठहर, ६ महिना कैद सजाय
काठमाडौं । विशेष अदालतले काठमाडौंको चन्द्रागिरि नगरपालिका–२ का वडाध्यक्ष भाइकृष्ण तामाङलाई भ्रष्टाचार मुद्दामा दोषी ठहर गरेको छ ।
मंगलबार विशेष अदालतका न्यायाधीशहरू अध्यक्ष टेकनारायण कुँवर तथा सदस्यहरू रामबहादुर थापा र रितेन्द्र थापाको इजलासले तामाङलाई दोषी ठहर गरेको हो । इजलासले उनलाई ६ महिना कैद र बिगो चार लाख कायम गरी त्यति नै जरिवाना हुने फैसला सुनाएको छ ।
उद्योगको ठाउँसारीका लागि सिफारिस गर्न उनले चार लाख घुस लिएको आरोपमा अख्तियारले मुद्दा चलाएको थियो ।
वडाध्यक्ष तामाङले ललितपुर महानगरपालिका–२२ नख्खुमा रहेको पी थ्री प्रोडक्टस् तथा भिष्ठा आइकोनिक प्रोडक्सन प्रालिको स्थानान्तरण गरी चन्द्रागिरि–२ वसुन्डोलमा ठाउँसारी गर्न र विद्युत् जडान समेतको सिफारिस लिनका लागि बिचौलियामार्फत घुस मागेका थिए ।
उनले त्यही वडाका ध्रुवबहादुर कडायतमार्फत दुई लाख रुपैयाँ नगद र दुई लाखको चेक लिएको उजुरीपछि अख्तियारले गत असार २० गते विशेष अदालतमा मुद्दा दायर गरेको थियो ।
