ज्यान मार्ने उद्योगमा सांसद दीपक मनाङे दोषी ठहर, पाँच वर्ष कैद सजाय
काठमाडौँ । गण्डकी प्रदेशका सांसद दीपक मनाङे ज्यान मार्ने उद्योगमा दोषी ठहर भएका छन् । मंगलबार सर्वोच्च अदालतका न्यायाधीश नहकुल सुवेदी र टेकप्रसाद ढुंगानाको संयुक्त इजलासले मनाङेलाई दोषी ठहर गरेको हो ।
यसअघि उनलाई उच्च अदालत पाटनले ज्यान मार्ने उद्योगको मुद्दामा दोषी ठहर गरेको थियो । उच्चको फैसलाविरुद्ध मनाङे सर्वोच्च पुगेका थिए ।
उच्च अदालतले मनाङेलाई पाँच वर्ष कैद सजाय तोकेको थियो । जिल्ला अदालत काठमाडौंले भने मनाङेलाई २ वर्ष कैद सजाय सुनाएको थियो । तर जिल्ला अदालतको फैसला चित्त नबुझेपछि सरकार उक्त मुद्दा लिएर पुनरावेदनमा गएको थियो ।
सर्वोच्चले उच्चको फैसला सदर गरेको छ । उनी मनाङ प्रदेश सभा–२ बाट २०७४ र २०७९ स्वन्त्रबाट निर्वाचित भएका थिए भने पटक पटक मन्त्री बनेका थिए ।
२०६१ सालमा चक्रे मिलनमाथि आक्रमण गरेको आरोपमा मनाङेसहितलाई ज्यान मार्ने उद्योगमा मुद्दा चलेको थियो ।
