नेतृत्वलाई टिकाउने कार्यकर्तालाई तुच्छ गाली नगरौं
गणेश प्रसाद दुलाल।
महाधिवेशन केन्द्रित बहसमा पूरक विचार
१. नेतृत्वले कार्यकर्तालाई गाली गर्नु वाञ्छनीय हुँदैन । कार्यकर्ताको अवमूल्यन, नेतृत्वकै अवमूल्यन हो । गण नभई गणनायक हुँदैन ।
२. हतियारबन्द माओवादी, गणतन्त्रवादी लगायतका सयौं प्रहार खेपेर नेतृत्वलाई टिकाउने कार्यकर्ताको तुच्छ शब्द प्रयोग गरेर सार्वजनिक मानमर्दन गर्नु हुँदैन ।
३. राजनीतिक दल सार्वजनिक संस्था हो । वैयत्तिक सम्पत्ति होइन ।
४. प्रजातन्त्र भनेकै विधिप्रधान अभ्यास हो । रहर र लहडमा चल्ने अवधारणा होइन ।
५. पार्टी नेता, कार्यकर्ताले मात्रै होइन, प्रजातन्त्रमा आम नागरिकले समेत दलमाथि चासो, समर्थन, खुला आलोचना गर्छन् ।
६. आलोचना, स्वतन्त्र टीप्पणी, मत मतान्तर, अभिव्यक्ति स्वतन्त्रता, मानव अधिकार, बहस छलफल र प्रतिपक्षी विहीनतामा प्रजातन्त्रको कल्पना समेत गर्न सकिन्न । सार्थक प्रजातन्त्र र मुर्दा प्रजातन्त्र बीचको भिन्नता छुट्याउन यसैले अपरिहार्य हुन जान्छ ।
७. नेतृत्व चयन, पुस्तान्तरणको माग र बहस प्रजातान्त्रिक पद्धति र अधिकार भित्रकै अभ्यास हो ।
८. प्रजातान्त्रिक अभ्यासमा अभ्यस्त हुने कार्यकर्तालाई नेतृत्वबाट प्रेरणा, उत्साह प्राप्त हुनु अन्यथा होइन ।
९. प्रजातन्त्रमा अभिव्यक्ति माथिको अवरोध कतै स्वीकार्य हुन्न । विचारशून्यता विधानको परिकल्पना होइन ।
१०. कार्यकर्ताको सम्मान नेतृत्वकै सम्मान हो, पार्टीकै सम्मान हो ।
