तपाईं केपी ओली भएको भए के गर्नुहुन्थ्यो, राजीनामा कि पेलपाल ?

राम लोहनी ।

हिजो एकजना मित्रले डरलाग्दो प्रश्न तेर्स्याए। प्रश्न थियो — तपाईँ केपी ओली भएको भए के गर्नुहुन्थ्यो? राजिनामा कि पेलपाल?
जीन्दगीको लाइफाँ यस्तो गारो कोइसन अहिलेसम्म कसैले पनि सोधेको थिएन। कति जाँच दिइयो, कति लेखियो, बोलियो। पास भइयो, फेल भइयो। तर कुनै प्रश्न पनि गर्न सकिएन भनेर हापेको थिइनँ। तर यो कोइसन लास्टै गारो भयो। तर पनि नेपाली हो, चानस पायो भने गर्छ भन्ने मन्त्रलाई सम्झिएँ। यस्तो कोइसन त भविष्यमा पनि आउनेवाला थिएन। तर पनि आँट आएन। अनि भनेँ — “हेर्नुस्, म एउटा सामान्य मान्छे हुँ, कम्युनिस्ट होइन। कम्युनिस्ट भए पनि पार्टीमा जाने खालको कम्युनिस्ट होइन। पार्टीमा गए पनि नेकपामा जाने होइन। नेकपामा गए पनि नेतृत्मा पुग्ने होइन। नेतृत्वमा पुगे पनि अध्यक्ष हुने होइन। अध्यक्ष भए पनि केपी ओली हुने होइन। केपी ओली भए पनि प्रधानमन्त्री हुने मान्छे होइन।”

तर मित्र पनि कडै निस्किए। भने — Everything remaining constant, अहिलेको केपी ओलीको ठाउँमा भएको भए के गर्नुहुन्थ्यो?
यो पूरा पुर वैज्ञानिक प्रश्न भयो। Everything remaining constant भनेपछि म गलेँ। आजसम्म विज्ञानलाई मान्दै आएको मान्छे वैज्ञानिक प्रश्नबाट भाग्ने कुरा पनि भएन। ख्वाक्क खोकेर घाँटी सफा गरेर भनेँ — “आजको परिस्थिति र आजको केपी ओलीको ठाउँमा म भएको भए म राजिनामा दिने थिइनँ। अध्यक्षको राजिनामा माग्न आउनेलाई महाधिवेशन बोलाउ भन्दिन्थेँ। प्रधानमन्त्रीको राजिनामा माग्न आउनेलाई संसदीय दलमा आउन भन्दिन्थेँ। त्यति मात्र होइन, उनीहरूसँग वार्ता गर्न भन्दा देशबासीको नाममा सन्देश दिन्थेँ। You go your way, I go may way भन्दिन्थेँ।”