यो सरकारले तपाईंहरुको काम हुँदैछ भन्ला, नपत्याउनुः मेयर साह
काठमाडौँ । काठमाडौँ महानगरपालिका मेयर बालेन साहले अहिले दुई तिहाइको सरकार भएपनि केही काम गर्न नसकेको आरोप लगाएका छन् ।
शुक्रबार काठमाडौंमा प्रथम कोटेश्वर महोत्सवको उद्घाटन गर्दै मेयर साहले ५० औं वर्षदेखि जग्गाको समस्याका कारण मुआब्जा नपाएको भन्दै सरकारले प्रकृयामा छ भनेर झुटो आश्वासन मात्र देखाएको आरोप लगाए ।
उनले सरकारले व्यक्तिको जग्गा लुटेर राखेको भन्दै अहिले सरकारमा प्रधानमन्त्री, गृहमन्त्रीदेखि अर्थमन्त्रीसम्म आफ्नै हुँदा पनि काम नभए अब कहिल्यै नहुने बताए ।
उनले भने, ‘कोही नेताले तपाईंहरुको काम प्रकृयामा छ । काम हुँदै छ भनेर आश्वासन दिन आउनुभएको छ भने नपत्याउनु होला । कुनै प्रोसेस भएको छैन । केही काम भएको छैन ।’
मेयर साहले दुई तिहाइको सरकार हुँदा पनि काम नहुने अवस्था आउनु दुःखद भएको बताए ।
