उर्जाराज्यमन्त्री तामाङको कम्पनी कालोसूचीमा परेको विषयमा राज्य व्यवस्था समितिमा र्याखर्याख्ती
काठमाडौं । नेपाली कांग्रेसका महामन्त्री विश्वप्रकाश शर्माले कांग्रेस नेता तथा उर्जाराज्यमन्त्री पूर्णबहादुर तामाङ (कान्छाराम)का विषयमा संसदीय समितिमा प्रश्न उठाएका छन् ।
शुक्रबार संसदको राज्य व्यवस्था तथा सुशासन समितिको बैठकमा महामन्त्री शर्माले तामाङको कान्छाराम/एनबी कन्स्ट्रक्सन कम्पनी कालोसूचीमा परेको विषयमा प्रश्न उठाएका हुन् ।
बैठकमा महामन्त्री शर्माले राज्यमन्त्री तामाङलाई यस विषयमा स्पष्ट पार्न आग्रह गर्दै समितिको ध्यान जानुपर्ने बताएका थिए । जवाफमा राज्यमन्त्री तामाङले आफूले सांसद हुनुभन्दा केही समयअघि नै कन्स्ट्रक्सन छाडिसकेको दाबी गरे ।
उनले भने, ‘मैले दुई–पाँच वर्षअघि नै कन्स्ट्रक्सन छाडेको हुँ । कानुनले रोक्ने गरी बस्दिनँ, सबै छाडिसकेँ ।’
त्यस्तै बैठकमा एमाले सांसद रुघुजी पन्तले पनि तामाङको कम्पनीले काम नगरेको, बीचैमा छाडेकोलगायतका प्रश्न गरेका थिए । यसमा पनि राज्यमन्त्री तामाङले तलमाथि गरे कानुनबमोजिम जरिवाना तिर्न तयार रहेको बताए ।
उनले आफूहरुले करोडौं धरौटी राखेकाले राज्यले त्यसलाई राज्यले जफत गर्न सक्ने बताए । प्रधानमन्त्री कार्यालय मातहतको सार्वजनिक खरिद अनुगमन कार्यालयले राज्यमन्त्री तामाङको कन्स्ट्रक्सन कम्पनीलाई साढे दुई वर्षका लागि कालोसूचीमा राखेको छ । मन्त्रीकै कम्पनी कालोसूचीमा परेको र उनलाई मन्त्रीबाट बर्खास्त गर्नुपर्ने माग उठ्दै आएको छ ।
