शिक्षा ऐनमार्फत शिक्षकका माग सम्बोधन युनियनको आग्रह
काठमाडौँ । नेपाली कांग्रेसको शुभेच्छुक संस्था नेपाल ट्रेड युनियन कांग्रेसले प्रस्तावित शिक्षा ऐन–२०८० मार्फत शिक्षकले उठाएका माग सम्बोधन गर्न आग्रह गरेको छ ।
नेपाल ट्रेड युनियन कांग्रेसका महासचिव अजयकुमार राईले विज्ञप्ति जारी गरी सरकारले सार्वजनिक गरेको विद्यालय शिक्षा ऐन, २०८० ले प्रबन्ध गरेका केही दफा संविधान प्रदत्त ट्रेड युनियन अधिकार, पेसागत सुरक्षा र संस्थागत हकहितको खिलाफमा रहेकाले त्यसलाई सच्याउन माग गरेका छन् ।
“मस्यौदाले देशभर कार्यरत लाखौँ स्थायी, अस्थायी÷करार, राहत, साविक उच्च मावि शिक्षक, बाल विकास शिक्षा, शिक्षण सिकाइ अनुदान शिक्षक, प्राविधिक धारलगायत सबैखाले शिक्षक र विद्यालय कर्मचारीका माग मुद्दाको न्यायोचित सम्बोधन गर्न उदासीन रहेको देखिन्छ”, महासचिव राईद्वारा जारी विज्ञप्तिमा भनिएको छ ।
विसं २०७५ तथा त्यसपछि स्थायी भई कार्यरत शिक्षकलाई पेन्सन प्रयोजनमा यस मस्यौदाले थप अन्योल र अन्याय थपेको बताइएको छ । देश विकास र गुणस्तरीय शिक्षा उत्पादन गर्न पेसाप्रतिको आकर्षण र सम्मान गर्नुपर्ने ठाउँमा झन उल्टै शिक्षक तथा शिक्षक कर्मचारी श्रमिक विरोधी ऐन ल्याउन खोजिएको नेपाल ट्रेड युनियन कांग्रेसले जनाएको छ ।
विद्यालय शिक्षा ऐन संशोधनसहित पुनः संसद्मा पेश गर्न नेपाल ट्रेड युनियन कांग्रेसले सरकारसँग आग्रह गरेको छ । नेपाल शिक्षक महासङ्घले यही साउन २८ गतेदेखि सञ्चालन गरिरहेको विरोधका कार्यक्रम आफ्नो समर्थन र ऐक्यबद्धता रहेको नेपाल ट्रेड युनियन कांग्रेसले जनाएको छ ।
