म्हपूजा कात्तिक १२ मा गर्ने मंका खलको निर्णय
काठमाडौं । नेपाल भाषा मंका खलले नेपाल संवत् अनुसारको नयाँ वर्षको प्रथम दिन कछलाथ्व प्रतिपदाका दिन नै म्हपूजा मनाउने निर्णय गरेको छ ।
खलका सचिव नरेशवीर शाक्यले जारी गरेको विज्ञप्तिमा आगामी कात्तिक १२ गते कछलाथ्व प्रतिपदाका दिन नेपाल संवत् ११४० तथा म्हपूजा मनाउने निर्णय गरेको जनाएको छ ।
त्यस्तै कात्तिक ११ गते कौलागा औँशीका दिन लक्ष्मी पूजा तथा कछलाथ्व द्वितीयाका दिन कात्तिक १३ गते बुधबार भाइटीका गर्ने निर्णय पनि गरेको छ । सो अनुसार चाडपर्व मनाउन नेवार समुदायलाई आग्रह गरेको छ ।
शताब्दी पुरुष सत्यमोहन जोशीले पञ्चाङ्ग निर्णायक समितिलाई तिथिको गणितमात्र नभई परम्परादेखि चल्दै आएको व्यवहारलाई पनि ध्यान दिन आग्रह गरे । प्राध्यापक डा त्रिरत्न मानन्धरले तिथिमा आधारित परम्परा व्यवहारमा लागू गर्ने उपाय स्पष्ट रहेको बताए ।
धर्मोदय सभाका अध्यक्ष यज्ञमानपति बज्राचार्यले नेवार समुदायमा लक्ष्मीपूजा, म्हपूजा तथा किजापूजा तीन दिन मनाउने चलन परम्परागत संस्कृति रहेको बताउँदै सोअनुसार स्वन्तिपर्व मनाउनुपर्ने बताए ।
नेपाल संवत् सदा कछलाथ्व प्रतिपदाका दिन परिवर्तन हुने र यसै दिन नेवारले म्हपूजा गर्ने चलन सयौँ वर्षदेखि व्यवहारमा रहँदै आएको छ । खलले नेपाल सरकारले पनि सोहीअनुसार बिदा दिन माग गरेको छ ।
