प्रचण्ड, देउवा र ओली बालुवाटारमा छलफलमा
काठमाडौं । प्रधानमन्त्री पुष्पकमल दाहाल प्रचण्ड, नेपाली कांग्रेसका सभापति शेरबहादुर देउवा र एमाले अध्यक्ष केपी शर्मा ओलीबीच प्रधानमन्त्री निवासमा छलफल भइरहेको छ ।
प्रधानमन्त्री प्रचण्डले संक्रमणकालीन न्यायसम्बन्धी विधेयक र संवैधानिक परिषद्को बैठकबारे छलफलका लागि देउवा र ओलीलाई बालुवाटार बोलाएका हुन् ।
संक्रमणकालीन न्यायसम्बन्धी दुईवटा विधेयक संसदीय समितिमा पारित हुने अवस्थामा पुगेका छन् । ती विधेयक समितिबाट पारित हुनै लाग्दा सत्ता गठबन्धनमा परिवर्तन आएपछि कांग्रेसले विधेयकमाथि अडान लिँदै आएको छ ।
नयाँ सत्ता गठबन्धन बनेपछि यी तीन शीर्ष नेताबीच पहिलोपटक संयुक्त बैठक भएको हो । यस्तै बैठकमा संसदमा कांग्रेसले गरिरहेको अवरोधबारे पनि छलफल हुने जनाइएको छ । कांग्रेसले उपप्रधानमन्त्री तथा गृहमन्त्री रवि लामिछानेमाथि संसदीय छानबिन हुनुपर्ने माग राखी संसद बैठक अवरोध गर्दै आएको छ ।
