एमालेको वार्ता सकारात्मक, कार्यदल बनाउने जिम्मा ओली र नेपाललाई
काठमाडौं । नेकपा एमालेको आन्तरिक विवाद समाधानका लागि शुक्रबार साँझको छलफल सकारात्मक भएको नेताहरुले बताएका छन् । करिव तीन घण्टा चलेको वार्तामा पार्टीलाई एकतावद्ध बनाउने विषयमा सौहर्दपूर्ण वातावरणमा छलफल भएको एमाले नेता रघुजी पन्तले जानकारी दिए ।
उपाध्यक्ष डा. भीम रावलले पार्टीको एकता कायम राख्नका लागि गम्भीरतापूर्वक छलफल भएको बताए । उनले २०७५ जेठ २ गते अघिको कुरालाई आधार मानेर अघि बढ्ने गरी छलफल अघि बढाइएको भन्दै त्यसका लागि कार्यदल बनाउने निर्णय भएको जानकारी दिए । कार्यदल बनाउने जिम्मा पार्टी अध्यक्ष केपी शर्मा ओली र वरिष्ठ नेता माधवकुमार नेपाललाई दिएको उनले बताए ।
छलफलमा अध्यक्ष ओलीका साथै ईश्वर पोखरेल, विष्णु पौडेल, रामबहादुर थापा, सुवास नेम्वाङ, शंकर पोखरेल, विष्णु रिमाल थिए । त्यस्तै नेपालपक्षबाट नेता नेपालसहित डा. भीम रावल, सुरेन्द्र पाण्डे, घनश्याम भुसाल, गोकर्ण विष्ट र रघुजी पन्त सहभागी थिए ।
ओलीसँगको वार्ताअघि नेता नेपालले आफू निकट केन्द्रीय सदस्यहरुलाई भर्चुअल बैठकमा पछिल्लो सहमतिबारे जानकारी गराएका थिए । ओली र नेता नेपालबीच बिहीबार पनि छलफल भएको थियो । बूढानीलकण्ठस्थित एक व्यापारीको घरमा भएको वार्ताले पार्टीको विवाद समाधानका लागि कार्यदल बनाउने समझदारी भएको थियो ।
