कोभिड–१९ अहिलेसम्मकै कठोर जनस्वास्थ्य सङ्कटः डब्ल्युएचओ
विश्व स्वास्थ्य सङ्गठन(डब्ल्युएचओ)ले कोभिड–१९ अहिलेसम्मकै सबैभन्दा कठोर जनस्वास्थ्य सङ्कटको रुप लिएको जनाएको छ । डब्ल्युएचओले कोभिड–१९ को सङ्क्रमण अहिलेसम्म स्वास्थ्य सङ्गठनले घोषणा गरेको जनस्वास्थ्य सङ्कटमध्ये सबैभन्दा कठोर बन्न पुगेको टिप्पणी गरेको हो ।
जेनेभामा आयोजित पत्रकार सम्मेलनमा डब्ल्युएचओका महानिर्देशक डा. टेड्रस अदनोम गेब्रेससले कोभिड–१९ बाट विश्वका एक करोड ६० लाख व्यक्ति सङ्क्रमित भएका भन्दै यस्तो टिप्पणी गरेका हुन् । कोभिड–१९ बाट हालसम्म छ लाख ४० हजार व्यक्तिले ज्यान गुमाएका छन् ।
चीनबाट सुरु भएको कोभिड–१९ को सङ्क्रमण हाल दोस्रो सबैभन्दा बढी जनसङ्ख्या रहेको भारतमा उच्च अवस्थामा पुग्दैछ । भारतमा दैनिक ५० हजार जनाभन्दा बढी व्यक्तिमा सङ्क्रमणको पुष्टि भइरहेको छ । अमेरिकामा दैनिक ६५ हजार सङ्क्रमित थपिँदैछन् ।
भारत, अमेरिका र ब्राजिलमा प्रत्येक दिन करिब एक एक हजार मृतक कोभिड–१९ को सङक्रमणबाट ज्यान गुमाइरहेका छन् ।
