आफ्नो देशबाट भागेका प्रहरी अधिकारी फर्काउन भारतलाई म्यान्मारको पत्राचार



म्यान्मारले सरकारको निर्देशन मान्न अस्वीकार गरेर छिमेकी भारत छिरेका केही प्रहरी अधिकारीलाई फिर्ता गर्न आग्रह गरेको छ । भारतीय अधिकारीका अनुसार म्यान्मारका केही प्रहरी अधिकारी र उनका परिवार पछिल्ला दिनमा भारत आइपुगेका छन् ।

म्यान्मारका अधिकारीहरूले भारतलाई पठाएको पत्रमा मैत्रीपूर्ण सम्बन्ध कायम राख्न ती प्रहरी अधिकारीलाई फर्काउन आग्रह गरेका हुन् । म्यान्मारमा गत महिना भएको सैन्य कूपछि विरोध प्रदर्शन र हड्ताल भइरहेका छन् । सुरक्षाकर्मीहरूले प्रदर्शनकारीहरूमाथि कडा रवैया अपनाएका छन् र अहिलेसम्म ५५ जनाको मृत्यु भइसकेको बताइएको छ ।

शनिवार पनि प्रदर्शनकारीहरूले देशभरि नै निषेधाज्ञा उल्लङ्घन गर्दै देशभर विरोधमा उत्रिएका थिए । सबैभन्दा ठूलो शहर याङ्गुनमा प्रहरीले अश्रु ग्यास, रबरका गोली र ग्रिनेडहरू प्रयोग गरेर भिड तितरबितर पारेका विवरणहरूमा जनाइएको छ ।

भारतको मिजोरम प्रान्तको चम्फाइ जिल्लाकी उपआयुक्त सीटी जुआलीले रोयटर्स समाचार संस्थालाई आफूले म्यान्मारको फालम जिल्लाबाट प्रहरी अधिकारीहरूलाई फिर्ता गर्ने अनुरोध गर्दै लेखिएको पत्र प्राप्त गरेको बताएकी छन् ।

पत्रमा करिब आठजना प्रहरी अधिकारी भारत छिरेका म्यान्मारलाई थाहा भएको उल्लेख गरिएको छ । आफूले दिल्लीस्थित गृह मन्त्रालयको निर्देशन कुरिरहेको जुआलीले बताइन् ।

रोयटर्सका अनुसार पछिल्ला दिनमा प्रहरी अधिकारीसहित करिब ३० जनाले सीमा कटेर भारतमा शरण लिन आइपुगेका छन् । शनिवार म्यान्मारका थप मानिसहरू भारत छिर्नका लागि सीमा क्षेत्रमा आइपुगेको भारतीय अधिकारीलाई उदृत गर्दै एएफपी समाचार एजेन्सीले छापेको छ ।

म्यान्मारको सेनाले फेब्रुअरीको शुरूमा जननिर्वाचित नेतृ आङ सान सूकीलाई नियन्त्रणमा लिएर शासन सत्ता हातमा लिएको थियो । त्यसको केही दिनदेखि नै नागरिक अवज्ञा अभियान शुरू भयो, कैयौँ मानिस काममा फर्कन अस्वीकार गरे र सडक प्रदर्शन भइरहेको छ ।

म्यान्मारका सुरक्षा फौजले त्यसप्रति कडा रवैया अपनाए र प्रदर्शनकारीमाथि गोली प्रहार गरेका छन् । सेनाले प्रदर्शनकारीको मृत्युमाथि प्रतिक्रिया व्यक्त गरेको छैन । २९ पत्रकारसहित सांसद प्रदर्शनकारी गरेर १७ सय भन्दा बढी मानिसलाई गिरफ्तार गरिएको संयुक्त राष्ट्र सङ्घीय मानव अधिकार प्रमुख मिशेल ब्याचलेले बताइन् ।

 

यो खबर पढेर तपाईलाई कस्तो महसुस भयो ?

प्रतिक्रिया दिनुहोस
कोरोना संक्रमणबाट भारतमा एकैदिन ९ सयको मृत्यु

भारतमा एकैदिन झण्डै १ लाख ७० हजार कोरोनाभाइरसका संक्रमित थपिएका छन् । भारतमा

इरानको एउटा परमाणु केन्द्र आतङ्ककारीको निसानामा

इरानको एउटा परमाणु केन्द्र आतङ्ककारी कार्यको निसानामा परेको परमाणुका एकजना उच्च अधिकारीले बताएका

यूक्रेनविरूद्ध कडा कदम नचाल्न रूसलाई अमेरिकाको चेतावनी

अमेरिकाले यूक्रेनमा विकसित पछिल्लो घटनाक्रमलाई आफूले नजिकबाट नियालेको भन्दै रूसलाई यूक्रेनविरूद्ध कडा कदम

जोर्डनी राजा र राजकुमार हमजा एकै स्थानमा सार्वजनिक

जोर्डनका राजा अब्दुल्लाह र उनका सौतेनी भाइ राजकुमार हमजा आइतवार एकैस्थानमा बसेको दृष्यलाई