भारतमा संक्रमण नदेखिएका क्षेत्रमा लकडाउन खुकुलो पारिने
भारत सरकारले लकडाउनको अवधि एक महिना थप गरेको छ । भारतको गृह मन्त्रालयले पाँचौ चरणको लकडाउन जुन ३० सम्म लागू गर्ने निर्णय गरेको हो । लकडाउन थप गरेपनि संक्रमण नदेखिएका ठाउँमा भने खुकुलो बनाउने निर्णय गरेको छ । भारतमा चौथो चरणको लकडाउन मे ३१ (आइतबार) समाप्त हुँदैछ । लकडाउनको अवधि लम्ब्याइए पनि संक्रमणको अवस्था हेरेर छुट दिइएको छ ।
संक्रमण भेटिएको क्षेत्र बाहिरका क्षेत्रमा चरणबद्ध रुपमा सबै चिज सुचारु गरिने बताइएको छ । पहिलो चरणमा जुन ८ देखि सबै धार्मिक स्थल, होटेल, रेस्टुरेन्ट, सैलुन र सपिङ सेन्टर तथा मलहरु खोलिने छ । त्यस्तै दोस्रो चरणमा विद्यालय, कलेजलगायतका शिक्षण संस्थाहरु राज्य सरकारहरुसँगको परामर्शमा खोलिने बताइएको छ ।
त्यस्तै एउटा राज्यबाट अर्को राज्यको यात्रामा लागेको प्रतिबन्ध पनि हटाइएको छ । अन्तर्राष्ट्रिय हवाई उडान, मेट्रो रेल सञ्चालन, सिनेमा घर, जिम, स्विमिङ पुल, थियटरलगायतका क्षेत्र सुचारु गर्ने बारेमा भने तेस्रो चरणमा निर्णय हुन सक्ने बताइएको छ । भारतमा हालसम्म एक लाख ७४ हजार ४ सय ९६ जनामा कोरोना भाइरसको संक्रमण पुष्टि भएको छ । कोरोनाबाट शनिबार साँझसम्म भारतमा ४ हजार ९ सय ८३ जनाको मृत्यु भएको छ । त्यस्तै सक्रमण पुष्टि भएकामध्ये करिब ८३ हजार निको भएका छन् ।
