लुम्बिनीलाई हराउँदै सुदूरपश्चिमलाई यु–१९ राष्ट्रिय क्रिकेटको उपाधि
काठमाडौं । नरेश श्रेष्ठ स्मृति यु–१९ राष्ट्रिय क्रिकेट प्रतियोगिताको उपाधि सुदूरपश्चिम प्रदेशले जितेको छ । लुम्बिनी प्रदेशलाई आठ रनले हराउँदै सुदूर च्याम्पियन बनेको हो ।
बुधबार सुदूरपश्चिमले दिएको १२८ रनको लक्ष्य पछ्याएको लुम्बिनीले ४३.१ ओभरमा विकेट गुमाउँदै ११९ रन मात्रै बनाउन सक्यो । लुम्बिनीका लागि कप्तान आकाश त्रिपठीले ४४ बलमा २२ रन बनाए। विजय कोहर १९, सन्तोष यादव १२ रन बनाउँदा समीर अली मुस्लिमले १८ रन बनाए ।
यस्तै, शिव कुँवर २० रनमा अविजित रहे पनि लुम्बिनीको हार टार्न सकेनन् । सुदूरपश्चिमको जितमा हेमन्त धामीले चार विकेट लिए। सचिन भट्ट दुई र नरेन साउद दुई विकेट लिए।
अशोक धामीको नामा एक रह्यो । त्यसअघि विराटनगरस्थित गिरिजाप्रसाद कोइराला क्रिकेट मैदानमा टस जितेर ब्याटिङ रोजेको सुदूरपश्चिमले ३७.३ ओभरमा सबै विकेट गुमाउँदै १२७ रन बनाएको थियो ।
सुदूरपश्चिमाका लागि अभिषेक थापाले २९, नरेन भट्टले २७, नरेन साउदले १५, राजेश ऐरले १४ र दीपक रोकायाले ११ रन बनाए । लुम्बिनीका लागि सन्तोष यादवले १० ओभरमा दुई मेडनसहित २८ रन खर्चिएर पाँच विकेट लिए।
यसैगरी रमेश कुर्मीले तीन र शिव कुँवरले एक विकेट हात पारे । समूह चरणबाट लुम्बिनी शीर्ष र सुदूरपश्चिम दोस्रो स्थानमा रहँदै फाइनल पुगेका हुन्।
