घरमा आगलागी हुँदा धरानमा आमाछोरीको मृत्यु

धरान । सुनसरीको धरानस्थित सिद्धकाली चोकको नजिक नरबहादुर श्रेष्ठको घरमा आगलागी हुँदा दुई जनाको मृत्यु भएको छ । आगलागीबाट श्रेष्ठकी ८७ वर्षीया आमा धनमाया श्रेष्ठ र सुस्त मनस्थितिकी ५७ वर्षीया बहिनी सीताको जलेर मृत्यु भएको छ । इलाका प्रहरी कार्यालय धरानका डिएसपी ढुण्डीराज न्यौपानेले दुई जनाको मृत्यु भएको जानकारी दिएका छन् ।

आगलागीबाट माथिल्लो तला काठले बनेका कारण पूर्ण रूपमा जलेको थियो । धरानका दुई दमकलको सहयोगमा आगो नियन्त्रणमा लिइसके पछि मात्रै उनीहरूको जलेर मृत्यु भएको पुष्टि भएको हो ।

प्रहरीले विद्युत् सर्ट भएका कारण आगलागी भएको अनुमान गरेको छ । नरबहादुर भने उक्त घरमा नबसी नयाँ घरमा सरेका थिए । आमा र बहिनीमात्रै घरमा बस्दै आएका थिए । छोरासमेत धनकुटा गएकाले घरमा वृद्धा आमा र बहिनी मात्रै रहेका थिए ।