कुटपिटबाट रुपन्देहीमा एक भारतीय नागरिकको मृत्यु
भैरहवा । रुपन्देहीमा कुटपिटबाट एक भारतीय नागरिकको मृत्यु भएको छ । मृत्यु हुनेमा भारत गोरखपुरका ४० वर्षीय निष्ठुरी केवट रहेका प्रहरीले जनाएको छ ।
प्रहरीका अनुसार रुपन्देहीको सियारी गाउँपालिका–७ हिरागंजस्थित न्यू कामना इँटा उद्योगमा कार्यरत केवट र उद्योगमै ट्याक्टर चालकको रुपमा कार्यरत सियारी गाउँपालिका–६ का १९ वर्षीय कृष्ण केवटबीच विवाद भइ कुटपिट भएको थियो ।
कृष्णले इँटाले हान्दा गम्भीर घाइते भएका निष्ठुरीको बुटवलस्थित लुम्बिनी प्रादेशिक अस्पतालमा उपचारको क्रममा बिहीबार राति मृत्यु भएको जिल्ला प्रहरी कार्यालय रुपन्देहीका डीएसपी एवम् सूचना अधिकारी सुरज कार्कीले जानकारी दिए । आरोपी कृष्णलाई पक्राउ गरेर घटनाका सम्बन्धमा अनुसन्धान भइरहेको प्रहरीले जनाएको छ ।
