हारेको उम्मेदवारलाई पाँचवर्ष उम्मेदवार बन्न नदिने आयोगको प्रस्ताव
काठमाडौँ । निर्वाचन आयोगले तीन तहका कुनै पनि निर्वाचनमा उम्मेदवार भई पराजित भएका व्यक्ति सम्बन्धित क्षेत्रकै उपनिर्वाचनबाहेक अन्य कुनै तहको निर्वाचनमा उम्मेदवार हुन नपाउने कानुनी व्यवस्था गर्न प्रस्ताव गरेको छ ।
एउटा निर्वाचनमा पराजित भएको व्यक्ति अर्को तहको निर्वाचनको उम्मेदवार बन्ने गरेकाले त्यसलाई रोक्न यस्तो व्यवस्था गर्न प्रस्ताव गरेको हो । प्रस्तावमा भनिएको छ, ‘संघीय संसद्, प्रदेशसभा वा स्थानीय तहको सदस्य पदमा उम्मेदवार भई पराजित भएको व्यक्ति सोही निर्वाचन क्षेत्र वा तहको उपनिर्वाचनबाहेक त्यस्तो पदको कार्यकाल पूरा नभएसम्म कुनै पनि तहको निर्वाचनमा उम्मेदवार हुन नसक्ने’ उल्लेख छ ।
अहिले एउटा तहका पराजित नेता अर्को तहको निर्वाचनमा उम्मेदवार बन्ने गरेका छन् । जनता समाजवादी पार्टीका अध्यक्ष उपेन्द्र यादव पराजित भएपछि उपनिर्वाचनमा उम्मेदवार भई विजयी भए। त्यस्तै कतिपय उम्मेदवार पराजित भएपछि दोहोरिएर पनि पराजित भएका थिए ।