ललिता निवासको जग्गा संरक्षणका लागि भन्दै महानगर प्रहरीको टोली बालुवाटारमा
काठमाडौं । ललिता निवासको जग्गामा तारबार गर्ने भन्दै काठमाडौ महानगरपालिकाको टोली बालुवाटार पुगेको छ । आइतबार दिउँसो महानगरका प्रहरी प्रमुख राजु पाण्डेको नेतृत्वमा महानगर प्रहरीहरू बालुवाटार पुगेका हुन् ।
ललिता निवासअन्तर्गतको खाली रहेको सार्वजनिक जग्गा संरक्षणका लागि भन्दै महानगरले तारबार लगाउन लागेको महानगरका प्रवक्ता नवीन मानन्धरले जानकारी दिएका छन् ।
ललिता निवासको करिब १४३ रोपनी सरकारी जग्गा व्यक्तिको नाममा गरेको अभियोगमा १७५ जनाविरुद्ध विशेष अदालतमा भ्रष्टाचार मुद्दा चलिरहेको छ । यो जग्गा व्यक्तिको नाममा नामसारी गर्ने क्रममा सरकारी कागजात किर्ते गरेको आरोपमा प्रहरीको केन्द्रीय अनुसन्धान ब्यूरो सीआईबीले पनि अनुसन्धान गरिरहेको छ । यसप्रकरणमा गत मंगलबार प्रहरीले चार जनालाई पक्राउ गरेको छ ।
