नक्कली भुटानी शरणार्थी प्रकरणमा आज थुनछेक आदेश हुने
काठमाडौं । नक्कली भुटानी शरणार्थी प्रकरणका १८ प्रतिवादीको थुनछेक बहस सकिएको छ। काठमाडौं जिल्ला अदालतका न्यायाधीश प्रेमप्रसाद न्यौपानेको इजलासमा बिहीबार बहस सकिएको हो ।
आज भने सरकारी वकिलले जवाफी बहस गर्ने छन्। जिल्ला न्यायाधीश न्यौपानेले सरकारी वकिललाई २ बजेसम्म जवाफी बहस सक्न आग्रह गरेका छन् । उनले दुई बजेसम्म जवाफी बहस सकेपछि आफूले आदेश गर्ने बताएका छन् ।
यस प्रकरणमा अहिलेसम्म १८ जना पक्राउ परेका छन् । थुनछेक बहस सकिएपछि उनीहरूलाई थुनामै राखेर मुद्दा अघि बढाउने कि धरौटी वा साधारण तारेखमा छोड्ने भन्नेबारे इजलासले निर्णय गर्ने छ ।
सरकारी वकिल कार्यालय काठमाडौंले यस प्रकरणमा ३० जनालाई प्रतिवादी बनाएको थियो । १२ जना अझै फरार छन् । प्रहरीले पठाएको प्रतिवेदनका आधारमा सरकारी वकिलले जेठ १० गते उनीहरूविरूद्ध ठगी, लिखत कीर्ते, राज्यविरूद्ध र संगठित अपराध र एकीकृत कसुरमा मुद्दा दर्ता गरेको हो ।
