विद्युत प्राधिकरणका कर्मचारीविरुद्ध भ्रष्टाचार मुद्दा दायर
काठमाडौँ । अख्तियार दुरुपयोग अनुसन्धान आयोगले नेपाल विद्युत प्राधिकरण, तनहुँ वितरण केन्द्र, आँबु प्रशाखामा कार्यरत कर्मचारी कृष्ण आलेविरुद्ध विशेष अदालतमा भ्रष्टाचार मुद्धा दायर गरेको छ ।
आलेलाई सेवाग्राहीबाट पाँच हजार रुपैयाँ घुससहित आयोगको टोलीले पक्राउ गरेको थियो । अनुसन्धानका क्रममा आलेले पोल तथा तारहरु मर्मत गरी दिएवापत नियमानुसार बुझाउनुपर्ने रकम बाहेक पाँच हजार रकम घुस माग गरी लिएको पाइएको छ ।
उनको उक्त कार्य भ्रष्टाचार निवारण ऐन, २०५९ को दफा ३ को उपदफा (१) बमोजिमको कसुर भएको ठहर गर्दै आयोगले आलेलाई बिगो पाँच हजार कायम गरी भ्रष्टाचार निवारण ऐन, २०५९ को दफा ३ को उपदफा (१) को देहाय (क) बमोजिम सजाय हुन मागदाबी लिई सोमबार विशेष अदालतमा मुद्दा दायर गरेको हो ।
