कुटनीतिक माध्यमबाटै कालापानीबाट भारतीय फौज फिर्ता पठाउँछौंः संचारमन्त्री बास्कोटा
काठमाडौं । सरकारले अतिक्रमित भूमिका विषयमा कूटनीतिक माध्यमबाटै समस्या समाधानको प्रयास भएको स्पष्ट पारेको छ । सूचना प्रविधि तथा सञ्चारमन्त्री गोकुल बाँस्कोटाले मन्त्रालयमा बिहीबार आयोजित नियमित पत्रकार सम्मेलनमा लिपुलेकदेखि लिम्पियाधुरासम्मको भूभाग नेपाली भूभाग हो भन्ने प्रमाण र तथ्यको आधारमा सरकारले कूटनीतिक पहल गरेर भारतीय फौज फिर्ता पठाउने बताएका हुन् ।
उनले भने,‘ लिपुलेकमा चर्का कुरा गरेर हुँदैन । कूटनीतिक माध्यमबाट वार्ताको टेबलमा बसेर भारतीय फौज हटाउँछौं।’
उनले चीनसँगको सीमा विवाद समाधानका लागि समिति बनेको र समितिले अब काम थाल्ने जानकारी दिए । उनले कालापानी र लिपुलेक नेपालकै भएको तथ्य र प्रमाण जुटिरहेको भन्दै कूटनीतिक माध्यमबाट अघि बढ्नुपर्ने बताए ।