‘हिंसा’ शब्द सच्चिएर नआउँदासम्म संसद अवरोधलाई निरन्तरता दिने माओवादीको निर्णय
काठमाडौं । नेकपा माओवादी केन्द्रले संसद अवरोधलाई जारी राख्ने भएको छ । शुक्रबार बसेको संसदीय दलको बैठकले सत्तारुढ नेकपा एमालेबाट ‘जनयुद्ध’लाई ‘हिंसा’ भनी अपमानित गर्ने काम गरेको भन्दै संसद अवरोधलाई जारी राख्ने निर्णय गरेको हो ।
सभामुख देवराज घिमिरेको रुलिङ ‘हिंसा’ शब्दलाई मात्रै केन्द्रित गरेर जनयुद्ध र जनमुक्ति सेनालाई अपमान गरेकाले संसद अवरोधलाई जारी राख्ने निर्णय गरेको प्रमुख सचेतक हितराज पाण्डेले जानकारी दिए ।
नेकपा एमालेका सचिव योगेश भट्टराईले प्रयोग गरेको ‘हिंसा’ शब्द असंसदीय नभएको सभामुख देवराज घिमिरेले निर्णय गरेको भन्दै माओवादी संसद अवरुद्ध गर्दै आएको छ ।
बुधबारको प्रतिनिधिसभा बैठकमा सभामुख घिमिरेले एमाले सचिव भट्टराईले प्रयोग गरेको हिंसा भन्ने शब्द असंसदीय नभएकाले रेकर्डबाट हटाउन नपर्ने निर्णय सुनाएका थिए ।
सभामुखले हिंसा शब्द रेकर्डबाट नहटाउने निर्णय गरेपछि नेकपा माओवादी केन्द्रका सांसदले विरोध गरेका थिए । भट्टराईले माओवादीले चलाएको ‘जनयुद्ध’लाई हिंसा भनेर भदौ १२ गतेको संसद्मा टिप्पणी गरेपछि विवाद भएको थियो ।
सभामुखले निर्णय सुनाउँदै भनेका थिए, ‘साउन १२ गते माननीय योगेश भट्टराईले प्रयोग गरेको हिंसालाई असंसदीय भनी हटाउन मागसहित भएको नियमापत्तिबारे छलफल भएको छ। प्रतिनिधिसभा नियमावलीको नियम २१ मा भएको व्यवस्था, भदौ १८ गतेको कार्य व्यवस्था तथा परामर्श समितिको बैठकको रायअनुसार उक्त शब्द संसद्को अभिलेखबाट हटाउनुनपर्ने निर्णय भएको छ ।’
सभामुखले निर्णय सुनाएपछि माओवादी केन्द्रका सांसदहरूले नियमापत्ति गर्दै संसदमा उठेर विरोध जनाएका थिए । त्यसपछि सभामुखले भदौ ३० गतेसम्मका लागि बैठक स्थगित गरेका छन् ।
