बल्ल कोशी प्रदेश सरकारमा कांग्रेस सहभागी, ४ मन्त्रीले लिए शपथ
विराटनगर । कोशी सरकारमा नेपाली कांग्रेसकातर्फबाट नियुक्त चार मन्त्रीले शपथ लिएका छन् । शुक्रबार प्रदेश प्रमुख परशुराम खापुङले उनीहरूलाई पद तथा गोपनीयताको शपथ गराएका हुन् ।
कांग्रेसले खोटाङका भूपेन्द्र राईको नेतृत्वमा तीन मन्त्री र एक राज्यमन्त्रीलाई सरकारमा पठाएको छ । राई भौतिक पूर्वाधारमन्त्री बनेका छन् भने सदानन्द मण्डल पर्यटन, वन तथा वातावरणमन्त्री र ताप्लेजुङका खगेनसिङ हाङगाम उद्योग, कृषि तथा सहकारीमन्त्री बनेका छन् ।
भूमिप्रसाद राजवंशी भौतिक पूर्वाधार राज्यमन्त्रीमा नियुक्त भएका छन् । योसँगै कोशीमा दुई राज्यमन्त्रीसहित एमाले–कांग्रेस गठबन्धनको १० सदस्यीय मन्त्रिपरिषद् बनेको छ ।
