कोशीका मुख्यमन्त्री कार्कीद्वारा दुई मन्त्री र दुई राज्यमन्त्री नियुक्त गर्दै मन्त्रिपरिषद विस्तार

विराटनगर । कोशी प्रदेशमा मन्त्रिपरिषद् विस्तार भएको छ । मुख्यमन्त्री हिक्मत कार्कीले सोमबार दुई मन्त्री र दुई राज्यमन्त्री नियुक्त गरेका हुन् । मुख्यमन्त्री कार्कीले लिलाबल्लभ अधिकारीलाई आन्तरिक मामिला तथा कानुन मन्त्रालय र बुद्धिकुमार राजभण्डारीलाई ऊर्जा, खानेपानी तथा सिंचाइ मन्त्रालयको जिम्मेवारी दिएका छन् ।

त्यस्तै, रामप्रसाद मेहता उद्योग, भूमि व्यवस्था तथा कृषि राज्यमन्त्री र निरन राई आर्थिक मामिला तथा योजना राज्यमन्त्रीमा नियुक्त भएका छन् । मुख्यमन्त्री कार्कीले विश्वासको मत नलिँदै मन्त्रिपरिषद् विस्तार गरेका हुन् । मुख्यमन्त्री कार्कीले २० असोजभित्र प्रदेशसभाबाट विश्वासको मत लिनुपर्नेछ । तर, मुख्यमन्त्री कार्कीले विश्वासको मत पाउने सम्भावना कम छ ।