प्रिओपन सेसनमै नेप्से परिसूचकको अलटाइम हाइ रेकर्ड तोडियो

काठमाडौं । बिहीबार नेप्से परिसूचकको अलटाइम हाइ रेकर्ड तोडिएको छ । आज प्रिओपन सेसनमानै रेकर्ड तोडिएको हो । अघिल्लो कारोबार दिन अर्थात् बुधबार ६४.७० अंक बढेर अलटाइम हाइ १८८१ विन्दुभन्दा ७ अंक तल अर्थात् १८७४.८१ विन्दुमा बन्द भएको नेप्सेले आज प्रिओपन सेसनमा नै रेकर्ड तोडेको हो ।

आज प्रिओपन सेसनमा नेप्से १९.६९ अंक बढी १८९४.७९ विन्दुमा पुगेको हो । यसअघि २०७३ साउन १२ गते नेप्सेले अलटाइम हाइ रेकर्ड (१८८१.४५) बनाएको थियो । बिहीबार सो सेसनमा ५६ कम्पनीको ८० लाख ४८ हजार ७०९ रुपैयाँ बराबरको १६ हजार १८१ कित्ता शेयर खरिदबिक्री भएको छ । जसमध्ये ४४ कम्पनीको शेयरमूल्य बढेको छ भने ६ कम्पनीको शेयरमूल्य घटेको छ । बाँकी ६ कम्पनीको शेयरमूल्य सो सेसनमा स्थिर रहेको छ ।