इनफ इनफका अनसनकारीलाई अनसन तोड्न प्रधानमन्त्रीको आग्रह

काठमाडौं । प्रधानमन्त्री केपी शर्मा ओलीले इनफ इनफका अनसनकारीहरूलाई ह्याम्स अस्पतालमा पुगेर भेट गरेका छन् । बिहीबार साँझ अस्पताल पुगेर प्रधानमन्त्रीले अनसनकारीहरुसँग भेट गरेका हुन् । त्यसक्रममा प्रधानमन्त्रीले सरकार कोभिड नियन्त्रण गर्न पारदर्शी ढंगले सक्रिय रहेको उल्लेख गर्दै सरकारको ध्यानाकर्षण भएकाले अनसन जारी राख्नु नपर्ने पनि बताएका छन् ।

जवाफमा अनशनरत युवाले आफूहरुका केही माग रहेको भन्दै छलफलका लागि कुनै माध्यम बनाइदिन प्रधानमन्त्री ओलीसँग आग्रह गरेका थिए । सरकारले कोभिड १९ विरुद्धको प्रतिकार्य प्रभावकारी ढंगले चलाउन नसकेको, पीसीआर परीक्षण बढाउनु पर्ने लगायत माग राखी अधिकारी लगायत ललितपुरको पाटन दरबार स्क्वायरमा एक सातादेखि अनशनमा बसेका थिए ।