सांसद ‘अपहरण’ घटनाको यथार्थ जानकारी गराउन नेम्वाङको माग
काठमाडौं । सत्तारुढ नेपाल कम्युनिष्ट पार्टीका संसदीय दलका उपनेता सुवास नेम्वाङले सरकारले समाजवादी पार्टीका सांसद ‘अपहरण’को घटनाको यथार्थ संसदमा जानकारी गराउनु पर्ने बताएका छन् ।
शुक्रबार संसदको छैठौं अधिवेशन प्रारम्भ भएको अवसरमा प्रतिनिधिसभामा सम्बोधन गर्दै नेम्वाङले यथार्थ संसदले थाहा पाउनु पर्ने बताएका हुन् । उनले संविधान कार्यान्वयन गर्नु दलहरुबीच सहमति आवश्यक रहेको र शान्ति प्रक्रियासम्बन्धी विधेयक टुंगो लगाउनु पर्ने बताए ।
विश्वव्यापी महामारी बनेको कोरोनाको असरलाई न्यूनिकरण गर्न अहिलेको अधिवेशनले महत्वपूर्ण काम गर्नुपर्ने र त्यससँगै पहिलेदेखि संसदमा दर्ता भएर बसेको विधेकलाई टुंगोमा पुयाउनुपर्ने उनले बताए ।
पूर्व बजेट छलफल, सरकारको नीति तथा कार्यक्रममा गम्भीर छलफल हुने उनले विश्वास व्यक्त गरे । नेम्वाङले सरकारले लकडाउन समयमै गरेका कारण अहिले नेपालमा कोही पनि भेन्टिलेटरमा नरहेको बताए । उनले सरकारले लकडाउनका कारण विदेशमा रहेका नेपालीलाई छिट्टै फिर्ता ल्याउने अपेक्षा गरेका छन् ।