युवाहरुलाई सीपसहितको रोजगारी दिन सकिए मात्रै समृद्धि सम्भवः मुख्यमन्त्री राउत
जनकपुरधाम । प्रदेश दुईका मुख्यमन्त्री लालबाबु राउतले युवाहरुलाई सीपसहितको रोजगारी दिनु आजको प्रमुख आवश्यकता रहेको बताएका छन् ।
युवा तथा साना व्यवसायी स्वरोजगार कोषले जनकपुरमा आयोजना गरेको स्वरोजगार कर्जा सम्बन्धि प्रदेश स्तरीय कार्यशाला गोष्ठीको उद्घाटन गर्दै मुख्यमन्त्री राउतले युवाहरुलाई सीप सहितको रोजगारीमा लगाउनु पर्ने बताएका हुन् ।
मानव संशाधन सबैभन्दा ठूलो शक्ति भएपनि त्यसलाई मुलुकले अहिलेसम्म परिचालन गर्न नसकेकै कारण मुलुक गरिब भएको उल्लेख गर्दै मुख्यमन्त्री राउतले युवाहरुलाई सीप सहितको रोजगारी दिन सकिए समृद्धि सम्भव रहेको बताए ।
युवाहरुलाई सीपयुक्त बनाउन प्रदेश सरकार प्राविधिक विश्वविद्यालयको अवधारणालाई अघि बढाएको भन्दै उनले प्रत्येक स्थानीय तहमा प्राविधिक शिक्षालय स्थापनाको लक्ष्य लिएको जानकारी दिए ।
स्वारोजगारको नाउमा उपलब्ध गराउने ऋणमा रहेको झन्झटिलो प्रक्रियाले लक्षित वर्गहरु सुविधा प्राप्त गर्न नसकेको टिप्पणी गर्दै उनले स्वरोजगारको लागि दिइने कर्जाको प्रक्रिया सहज गर्न कोषलाई सुझाव दिए ।