मस्को। युक्रेनले रुसको दोस्रो ठूलो ई–कमर्स कम्पनी ओजोनका लजिस्टिक केन्द्रलाई लक्षित गरी ड्रोन आक्रमण तीव्र पारेको छ । कम्पनीले सोमबार दक्षिणी क्रास्नोदार क्षेत्रमा रहेको आफ्नो अर्को लजिस्टिक केन्द्रमा ड्रोन आक्रमणपछि ठूलो आगलागी भएको जनाएको छ ।
युक्रेनले रुसी सेनालाई सामग्री आपूर्ति गरेको आरोप लगाउँदै रुसको प्रमुख अनलाइन खुद्रा विक्रेता वाइल्डबेरीजका लजिस्टिक केन्द्रलाई केही सातादेखि निसाना बनाउँदै आएको छ ।
ओजोन रुसको दोस्रो ठूलो अनलाइन बजार हो । यसका देशभर डेलिभरी केन्द्र, सामान बुझ्ने स्थान तथा बक्सहरू रहेका छन् । दुवै कम्पनीले रुसको तीव्र गतिमा विस्तार भइरहेको ई–कमर्स बजारको ठूलो हिस्सा ओगटेका कारण तिनलाई ‘रुसको अमेजन’ समेत भन्ने गरिन्छ ।
ओजोनले सोमबार टेलिग्राममार्फत क्रास्नोदारस्थित लजिस्टिक केन्द्रमा ड्रोन आक्रमणपछि ठूलो आगलागी भएको जनाएको छ । कम्पनीका अनुसार कर्मचारीलाई तत्काल सुरक्षित स्थानमा सारिएको र प्रारम्भिक जानकारीअनुसार मानवीय क्षति नभएको बताइएको छ ।
यसअघि आइतबार मध्य रुसको ओरेनबर्ग क्षेत्रमा रहेको ओजोनको लजिस्टिक केन्द्रमा पनि ड्रोन आक्रमणपछि आगलागी भएको थियो । कम्पनीले उक्त केन्द्रको सञ्चालन तत्कालका लागि रोकिएको जनाएको छ ।
त्यसको अघिल्लो दिन छिमेकी समारा क्षेत्रमा रहेको ओजोनको अर्को केन्द्रमा आक्रमण भएको थियो । उक्त घटनामा केही कर्मचारी घाइते भएको कम्पनीले जनाएको छ ।
युक्रेनी सेनाले शनिबार ओजोनलाई लक्षित गर्दै नयाँ अभियान सुरु गरेको पुष्टि गरेको थियो । युक्रेनी रक्षा मन्त्रालयले वाइल्डबेरीजका १५ ठूला लजिस्टिक केन्द्रमा आक्रमण गरेपछि अब ओजोनलाई लक्षित गरिएको जनाएको छ ।
सेन्ट पिटर्सबर्गको बाहिरी क्षेत्रमा रहेको ओजोनको सुविधा केन्द्रनजिकैको अर्को लजिस्टिक केन्द्रमा पनि आक्रमण भएको बताइएको छ ।
सैन्य अखडाको तुलनामा तुलनात्मक रूपमा कम सुरक्षा भएका लजिस्टिक केन्द्रलाई लक्षित गरिएका आक्रमणले ठूलो आर्थिक क्षति पु¥याएको छ । केही केन्द्रमा अत्यधिक ज्वलनशील सामग्री भण्डारण गरिएकाले आगलागीपछि ती पूर्ण रूपमा नष्ट भएका छन् ।
रुसी राष्ट्रपति भ्लादिमिर पुटिनले वाइल्डबेरीजलाई सहयोग गर्ने प्रतिबद्धता जनाउँदै युक्रेनी आक्रमणबाट क्षतिग्रस्त लजिस्टिक केन्द्र पुनर्निर्माणमा सरकारले सहयोग गर्ने बताएको छ । रुसले युक्रेनमाथि आक्रमण सुरु गरेयता आफ्ना नागरिक पूर्वाधारमा भएका युक्रेनी आक्रमणको आलोचना गर्दै आएको छ ।
प्रतिक्रिया