रुसबाट ५०३ युक्रेनी सेनाको शव फिर्ता ल्याएको किएभको भनाई

किएभ । किएभले शुक्रबार रुसबाट मारिएका ५०३ जना युक्रेनी सैनिक सदस्यको शव प्राप्त गरेको बताएको छ । यो लडाइँको उच्च मूल्य औँल्याउने पछिल्लो शव फिर्तीको घटना हो ।

सन् २०२२ मा रुसले आक्रमण गरेदेखि मस्को र किएभबीचको सहकार्यका केही क्षेत्रमध्ये कैदी र मारिएका सैन्य कर्मचारीहरूको शवको आदानप्रदान रहेको छ ।

“पाँच सय तीन जना युक्रेनी रक्षकको शव युक्रेन सरकारको नियन्त्रणमा रहेको इलाकामा फिर्ता गरिएको छ”, युद्धका कैदीहरूको उपचारका लागि समन्वय मुख्यालयले सामाजिक सञ्जालमा एक विज्ञप्तिमा भनेको छ ।

शुक्रबार जनाइएको यो शव फिर्ती अक्टोबरयता ५०० वा बढी शव समावेश भएको कम्तीमा चौथो घटना हो र यसले रुसी आक्रमणको लगभग तीन पूर्ण वर्षमा लडिएका महँगा युद्धहरूको क्षतिलाई चित्रण गर्दछ ।

राष्ट्रपति भोलोदिमर जेलेन्स्कीले यस महिना सन् २०२२ फेब्रुअरीमा क्रेमलिनले युक्रेनमा आफ्नो सेना पठाएयता ४३ हजार सैनिक मारिएको र तीन लाख ७० हजार घाइते भएका बताएका थिए ।

समन्वय मुख्यालयले शुक्रबार डोनेट्स्क क्षेत्रबाट चार सय तीन शव फिर्ता गरिएको बताएको छ । डोनेट्स्क क्षेत्रमा लडाइँको सबैभन्दा खराब स्थिति छ ।

बाँकी शव लुगान्स्क र जापोरिजिया क्षेत्रहरू र रुसया भित्रका शवगृहहरूबाट फिर्ता गरिएको छ । क्रेमलिनले २०२२ को अन्त्यतिर दक्षिणी खेर्सन क्षेत्रसँगै यी तीन क्षेत्र आफूमा गाभेको दाबी गरेको थियो तर कुनै पनि क्षेत्रमाथि पूर्ण नियन्त्रण छैन ।

रुसले आफ्ना शवहरूको फिर्तीको घोषणा गर्दैन वा युक्रेनमा लड्दा मारिएका आफ्ना सैनिकहरूको अद्यावधिक सङ्ख्या दिँदैन ।