कोलम्बिया सरकार र विद्रोही समूहबीच शान्तिवार्ता हुने
कोलम्बियाको सरकार र यहाँका विद्रोही समूहका बीचमा आगामी महिना शान्ति वार्ता हुने भएको छ । कोलम्बियाको सरकारले यससम्बन्धी जानकारी गराएको हो ।
सरकारले यहाँका विद्रोही समूह नेशनल लिबरेसन आर्मी (इएलएन) सँग शान्ति वार्ताका लागि पहल गरेको र आगामी महिना नै वार्ता हुने भएको सूचना कोलम्बियाली सरकारले दिएको हो ।
शनिबार विद्राही समूह र सरकारी वार्ता टोलीका बीचमा यस्तो सहमति भएको हो । यहाँको सरकारी वार्ता टोलीका प्रमुख ओटी प्याटिनोले सरकारी र विद्रोही समूहका वार्ता टोलीका सदस्यका बीचमा वार्ता भएको र वार्तामा आगामी महिना शान्ति वार्ता हुने जानकारी दिए ।
उनले अबको वार्ता दोस्रो चरणको हो भन्दै यसबाट देशमा शान्ति स्थापनाका लागि सहयोग पुग्ने बताए । अबको वार्तामा सरकारी पक्ष पनि आशावादी भएको र दुवै पक्ष सहमतिको नजिकमा पुग्ने सम्भावना धेरै रहेको पनि उनले बताए ।
वार्ताका क्रममा दुवै पक्षका बीचमा धेरै कुरामा समझदारी भएको र आगामी केही दिनमा नै युद्धविरामको पनि सहमति हुने उनले बताए । यहाँको सरकारले यहाँ दशकौँसम्म जारी रहेको हिंसाको अन्त्यका लागि शान्ति वार्ताका माध्यमबाट अधिकतम प्रयास गर्ने बताएको छ ।
