उत्तर कोरियाद्वारा प्लूटोनीअम उत्पादन केन्द्र पुनः सञ्चालनमा
संयुक्त राष्ट्रसङ्घीय निकायले उत्तर कोरियाले एउटा पारमाणविक रियाक्टर पुनः सञ्चालनमा ल्याएको र त्यसले पारमाणविक अस्त्रका लागि प्लूटोनीअम उत्पादन गर्ने जनाएको छ ।
अन्तर्राष्ट्रिय पारमाणविक ऊर्जा एजेन्सी (आईएईए) ले यङब्युन रियाक्टरले जुलाई महिनादेखि नै चिस्यान गर्ने पानी फालिरहेका सङ्केतहरू फेला परेको जनाएको हो । त्यसबाट उक्त पारमाणविक रियाक्टर सञ्चालनमा रहेको बुझिन्छ ।
त्यो केन्द्र सन् २०१८ देखि निष्क्रिय थियो । भूउपग्रहमार्फत् सो पारमाणविक केन्द्रको पर्यवेक्षण गर्ने गरेको आईएईएले पछिल्लो विकासक्रमलाई गहिरो चिन्ताको विषयको रूपमा अर्थ्याएको छ ।
साथै सुरक्षा परिषद्ले पारित गरेका सङ्कल्प प्रस्तावहरूको पनि त्यसबाट उल्लङ्घन भएको आईएईएले जनाएको छ । सन् २००९ मा उत्तर कोरियाले आईएईएका पर्यवेक्षकहरूलाई फिर्ता दक्षिण कोरियाका विदेशमन्त्रीले आफ्नो सरकारले उत्तर कोरियाली पारमाणविक तथा क्षेप्यास्त्र गतिविधिहरूलाई अमेरिकासँगको सहकार्यमा नजिकबाट निरन्तर हेरिरहेको योन्हाप समाचारसंस्थालाई बताएका छन् ।
आईएईएका पर्यवेक्षकहरूलाई फिर्ता पठाएयता उत्तर कोरियाले पारमाणविक विकासलाई निरन्तरता दिँदै आएको छ । सन् २०१७ मा उसले पछिल्लो पारमाणविक परीक्षण गरेको थियो ।
गत जनवरीमा उत्तर कोरियाली नेता किम जङ–उनले देशको पारमाणविक क्षमतामा आधुनिकीकरण गर्न चाहेको बताएका थिए । प्योङ्याङले प्लूटोनीअम उत्पादन थालेकै हो भने त्यसले अमेरिकी राष्ट्रपति जो बाइडनका निम्ति एउटा ठूलो वैदेशिक सङ्कट निम्त्याउनेछ ।
