‘जन्मिँदा संसारकै सबैभन्दा सानी शिशु’ १३ महिनापछि अस्पतालबाट घर

जन्म हुँदा संसारकै सबैभन्दा सानो भन्ठानिएकी एक शिशुलाई सिङ्गापुरमा १३ महिना सघन उपचार गरेर अस्पतालबाट घर पठाइएको छ । जन्मिँदा क्वेक यु सुआनको तौल २१२ ग्राम अर्थात् एउटा स्याउको जति र लम्बाइ २४ सेन्टिमिटर थियो । उनी २५ साता पनि नपुगी जन्मिएकी थिइन् ।

त्यसअघि सन् २०१८ मा अमेरिकामा जन्मिएकी एक शिशुको तौल २४५ ग्राम भएको अभिलेख यूनिभर्सिटी अफ आईअवाको टाइनीएस्ट बेबीज रेजिस्ट्रीमा छ । गर्भवती हुँदा यु सुआनककी आमाको रक्तचाप एकदमै बढेर ‘प्री–इक्ल्याप्सीआ’ नामक समस्या उत्पन्न भएको थियो । त्यस्तो अवस्थामा महत्वपूर्ण अङ्गमा क्षति पुग्न सक्ने तथा आमा र बच्चा दुवैको ज्यान जान सक्ने हुन सक्थ्यो । त्यसैले शल्यक्रिया गरेर उनलाई गर्भबाट बाहिर निकालिएको थियो । यु सुआनको तौल अहिले छ किलो ३०० ग्राम पुगेको छ।

सिङ्गापुरको न्याश्ननल यूनिभर्सिटी हस्पिटल (एनयूएच) का अनुसार जन्मिएको बेला ती बालिका जीवित रहने सम्भावना सीमित रहेको जनाएको छ । यु सुआन समयभन्दा चार महिनाअघि जन्मिएकी हुन् ।

अस्पतालमा हुँदा यु सुआनलाई विभिन्न किसिमका उपचार गरियो। उनको जीवन रक्षार्थ विभिन्न किसिमका उपकरणहरू प्रयोग भएका थिए । चिकित्सकहरूले आफ्नो सेवाबाट ती शिशुको स्वास्थ्य तथा विकासमा राम्रो सुधार आएको र अहिले अस्पतालबाट डिस्चार्च गर्न उपयुक्त भएको बताए । यु सुआनलाई अझै फोक्सोसम्बन्धी दीर्घ समस्या छ र उनलाई घरमा श्वासप्रश्वासका लागि सहयोग चाहिन्छ ।

तर एनयूएचका चिकित्कहरूका अनुसार उनी समयक्रममा बिस्तारै ठिक हुने अपेक्षा गरिएको छ । आफ्नो जेठो छोरो समय पुगेर जन्मिएकाले यु सुआनको जन्म र आकारका कारण आफू चकित भएको आमा वोङ मेई लिङले स्थानीय सञ्चारमाध्यमलाई बताएकी छन् ।

यु सुआानको उपचारका लागि क्राउडफन्डिङबाट दुई लाख ६६ हजार ८८४ सिङ्गापुर डलर सङ्कलन गरिएको थियो । त्यसैबाट उनका आमाबुवाले अस्पतालको लामो बसाइ र उपचार खर्च तिरेका हुन्।