ट्युनिसियाका राष्ट्रपतिद्वारा प्रधानमन्त्री बर्खास्त, संसद पनि भंग
देशभरि हिंसात्मक प्रदर्शनहरू चर्किएपछि ट्यूनिशियाका राष्ट्रपतिले प्रधानमन्त्रीलाई पदमुक्त गर्दै संसद् निलम्बन गरेका छन् । सरकारले प्रभावकारी ढङ्गले कोभिड–१९ महामारी नियन्त्रण गर्न नसकेको भन्दै आइतबार दशौँ हजार मानिस प्रदर्शनमा निस्केका थिए र प्रहरीसँग उनीहरूको झडप भएको थियो ।
देशमा शान्ति ल्याउन चाहेको भन्दै राष्ट्रपति काइस साईदले नयाँ प्रधानमन्त्रीको सहयोगमा आफूले नेतृत्व लिने बताएका छन् । तर विपक्षीहरूले उनको कदमलाई ‘कू’ अर्थात् सत्तापलटको सङ्ज्ञा दिएका छन् । राष्ट्रपति कार्यालयमा आपत्कालीन सुरक्षा बैठक गरेपछि उनले टेलिभिजनमार्फत् सम्बोधन गरेका थिए ।
प्रधानमन्त्री हिसेम मेशीशीलाई बर्खास्त गरिएको खबर आइतवार अबेर राति सार्वजनिक भएपछि मानिसहरूले हर्षोल्लास गर्दै बाहिर निस्किएका थिए । त्यसपछि राजधानी ट्यूनिसमा राष्ट्रपति साईद पनि भिडहरूमा सहभागी भएका थिए । ट्यूनिसहित अन्य थुप्रै सहरमा झडपहरू भएका छन्।
त्यस क्रममा प्रहरीले अश्रुग्यास प्रहार गर्नुका साथै थुप्रै प्रदर्शनकारीलाई गिरफ्तार गरेको छ । राष्ट्रपति साईदले थप हिंसाहरू भए त्यसलाई नियन्त्रणमा लिन सेनाको प्रयोग गरिने चेतावनी दिएका छन् । संसद्माथि सम्भावित खतरा छ भने त्यसलाई निलम्बन गर्ने अधिकार संविधानले आफूलाई प्रदान गरेको राष्ट्रपतिको दाबी छ ।
तर निलम्बनमा परेको संसद्का सभामुख राशिद गनुशीले ट्यूनिशियाको क्रान्ति र संविधानमाथि कू गरिएको आरोप लगाएका छन् । दश वर्षअघि ट्यूनिशियामा क्रान्तिमार्फत् प्रजातन्त्र स्थापना भएको थियो।
त्यहीँबाट सो क्षेत्रमा अरब क्रान्ति आरम्भ भयो । तर त्यसपछि थप रोजगारी तथा अवसरहरू सिर्जना हुने आशा गरिएको थियो। तर त्यसो हुन नसक्दा मानिसहरू निराश देखिन्छन् । क्रान्तिको एक दशक बितिसक्दा ट्यूनिशिया गम्भीर आर्थिक सङ्कटबाट गुज्रिरहेको छ भने उसले अफ्रिकाकै सबैभन्दा नराम्रो कोरोनाभाइरस महामारी झेलिरहेको छ।
