हिमाचल प्रदेशमा पहिरोले पर्यटकको गाडीमा पुरिँदा नौ जनाको मृत्यु
उत्तर भारतको हिमाचल प्रदेशमा पर्यटकहरू सवार एउटा सवारीसाधनमा पहिरो खस्दा नौ जनाको मृत्यु भएको छ । आइतबार भएको उक्त घटनामा अन्य तीनजना घाइते भएका छन् ।
घटनास्थलमा खिचिएको तथा सामाजिक सञ्जालमा प्रेषित भिडियोमा एउटा पहाडबाट पहिरो खसेको र ठूलाठूला ढुङ्गा एउटा पुलमा बजारिएको देखिन्छ । बटसेरी–साङ्गला मार्गमा अचानक पहाडमा विस्फोट भएको जस्तो सुनिएको अनि धूलो उडेको देखिएको बीबीसी हिन्दीले जनाएको छ। त्यसपछि तीव्र गतिमा ढुङ्गाहरू तल खस्न थालेका थिए ।
किन्नौर जिल्लामा पहिरो गएपछि उद्धारका लागि सुरक्षाकर्मीहरू परिचालित भएका थिए । रोकेर राखिएका सवारीसाधनमा ठूला ढुङ्गाहरू बजारिएको अनि त्यसपछि पुल भत्किएको दृश्य ट्विटरमा प्रेषित भिडिओमा देखिन्छ। उक्त घटना किन्नौर जिल्लामा भएको हो । देशका प्रधानमन्त्री नरेन्द्र मोदीले शोक प्रकट गर्दै मृतकका परिवारजनप्रति समवेदना व्यक्त गरेका छन् ।
उनले पीडितका परिवारलाई सरकारी कोषबाट राहत उपलब्ध गराइने बताए । मुख्यमन्त्री ठाकुरका अनुसार पीडित पक्षलाई आवश्यक सहयोग उपलब्ध गराउन तत्काल कार्य भइरहेको छ । दिल्लीबाट हिमाचलको प्रसिद्ध चितकुल गाउँ घुम्न जान गएका मानिसहरू उक्त गाडीमा भएको हिन्दुस्तान टाइम्स पत्रिकाले जनाएको छ । के कारण पहिरो गयो भन्ने स्पष्ट नभए पनि ठूलो वर्षाको पूर्वानुमान गरिँदा पहिरोबारे चेतावनी जारी गरिएको थियो । उक्त घटना भएको बेला पानी भने परेको थिएन ।
