इराकमा बम आक्रमणमा परी कम्तीमा २५ को मृत्यु, कैयौँ घाइते
इराकको राजधानी बगदादमा भएको बम विस्फोटनमा कम्तीमा २५ जनाको मृत्यु भएको भने दर्जनौँ घाइते भएका छन् । विस्फोटन एउटा व्यस्त बजारमा भएको थियो । सर्वसाधारणहरूले मङ्गलवार मुस्लिम पर्व इदको तयारी गरिरहँदा उत्तरी साड सहर क्षेत्रमा विस्फोटन भएको हो ।
पछिल्लो छ महिनामा त्यहाँ भएको यो सबैभन्दा घातक विस्फोटन हो । इस्लामिक स्टेट (आईएस) समूहले घटनाको जिम्मेवारी लिएको छ । इराकी सरकारले सन् २०१७ को अन्त्यमा सुन्नी मुस्लिम जीहादी समूहमाथि विजयी भएको घोषणा गरेको थियो ।
तर पनि गोप्य रूपमा केही सदस्यले सानातिना घटनाहरू गराउँदै आएका थिए । गत अप्रिलमा चार जनाको मृत्यु हुने गरी गरिएको कार बम हमलामा पनि आफ्नो हात रहेको आईएसले जनाएको थियो ।
उसले गत जनवरीमा ३२ जनाको ज्यान जाने गरी गरिएको आक्रमणको पनि जिम्मा लिएको छ । त्यो राजधानी बगदादमा पछिल्लो तीन वर्षमा भएको सबैभन्दा घातक बम आक्रमणको घटना थियो ।
सुरक्षा स्रोतहरूले समाचार संस्था रोयटर्सलाई बताए अनुसार सोमबारको आक्रमणमा मारिनेहरूमा महिला र बालबालिका पनि थिए । केही पसलहरूमा आगलागी भएको उनीहरूले बताएका छन् ।