विश्वमा चराचुरुङ्गीको संख्या ४३० अर्ब
विश्वमा चराचुरुङ्गीको संख्या ४३० अर्बसम्म रहेको हुनसक्ने एउटा नयाँ अनुसन्धानले देखाएको छ । प्रोसिडिङ्ग्स अफ नेशनल एकेडेमी अफ साइन्सेसमा प्रकाशित शोधले पहिलो पटक त्यसरी चराको गणना गर्न खोजेको थियो । त्यसमा चराविद्हरूले सँगालेका विवरणहरू समेटिएको छ ।
विश्वमा सबैभन्दा धेरै सङ्ख्यामा भँगेरा रहेका र तिनको सङ्ख्या एक अर्ब ६० करोड रहेको बताइएको छ । तीन वटा अन्य प्रजातिका चराहरू – युरोपियन स्टारलिङ्स, बार्न स्वालोज र रिङ्–बिल्ड गल्स – पनि प्रत्येकको कूल सङ्ख्या एक अर्बभन्दा धेरै रहेको पाइएको छ । तर धेरै चराका प्रजाति भने दुर्लभ रहेका छन् ।
प्रत्येक दशमध्ये एक प्रजातिका चराको सङ्ख्या भने पाँच हजारभन्दा कम रहेको जनाइएको छ । संसारभरिका चराको सङ्ख्याको यो अध्ययनले संरक्षणको काममा सघाउ पुग्ने अनि तिनलाई लोप हुनबाट जोगाउने अस्ट्रेलियाको युनिभर्सिटी अफ न्यू साउथ वेल्सका टोलीले बताएका छन् ।
एक अध्ययनकर्ता डा. कोरे क्यालाहनले भनिन्, ‘हामीले धेरै समय आफ्नै जातिको सङ्ख्या गन्न लगाउँछौँ। तर हामीले हाम्रो ग्रहको जैविक विविधताको पनि लेखाजोखा गर्नु जरुरी छ।’ चराको गणना कार्य निकै जटिल हुन्छ। र यसले दिने परिणाम पनि यकिनभन्दा अनुमान हुन्छ । विगतमा गरिएका अनुमानहरूमा १० देखि १३ हजार प्रजातिका चराको कूल जनसङ्ख्या २०० देखि ४०० अर्बसम्म रहेको हुनसक्ने देखिएका थिए ।
अस्ट्रेलियाका अनुसन्धानकर्ताहरूले यसपालि ९,७०० प्रजातिका चराहरूको सङ्ख्यालाई चराविद्हरूले गत एक दशकमा इबर्ड नामक अनलाइन डेटाबेसमा उल्लेख गरेका डेटा प्रयोग गरेर मूल्याङ्कन गरेका थिए । तिनमा घरपालुवा चरा जोडिएको छैन । डेटाको वैज्ञानिक मोडलिङ अनि विज्ञहरूले पठाएका जानकारीहरू मिलाएर अनुमान गरिएको बताइएको छ ।
धेरै चराहरू उत्तरी गोलाद्र्धमा पाइने देखिएको छः युरोप, उत्तरी एसिया, उत्तरी अफ्रिका, अरेबियन प्रायद्वीपका क्षेत्र तथा उत्तरी अमेरिकामा । भविष्यमा जैविक विविधता मापन गर्न नागरिक तहका विज्ञान डेटाले आधारभूत भूमिका खेल्ने डा क्यालाहनले बताइन् ।