अमेरिकालाई ‘दुर्गन्ध नफैलाउन’ उत्तर कोरियाका नेताकी बहिनीको चेतावनी
उत्तर कोरियाली नेता किम जङ–उनकी बहिनीले अमेरिकालाई ’दुर्गन्ध ननिकाल्न’ चेतावनी दिएकी छन् । किम यो–जङले अमेरिकी राष्ट्रपति जो बाइडनले आफ्नो कोरियाली नीति सार्वजनिक गर्ने तयारी गरिरहँदा यस्तो बताएकी हुन् ।
सरकारी सञ्चारमाध्यममा अन्तर्वार्ता दिँदै उनले अमेरिका र दक्षिण कोरियाको संयुक्त सैन्य अभ्यासको पनि आलोचना गरिन् । अमेरिकी सरकारले उत्तर कोरियासँग कूटनीतिक सम्पर्कका लागि हप्तौँदेखि प्रयास गरे पनि त्यो सफल नभएको बताएको छ ।
उत्तर कोरियाले अहिलेसम्म बाइडनको कार्यकाल सुरु भएको विषयमा बोलेको छैन । ‘समुद्र पारिबाट हाम्रो जमिनमा बारुदको गन्ध फैलाउन सङ्घर्ष गरिरहेको अमेरिकाको नयाँ प्रशासनलाई एउटा सुझावः आउने चार वर्ष शान्तिपूर्वक जिउने इच्छा छ भने पहिलो चरणमै दुर्गन्ध फैलाउने कामबाट परै रहनु ठिक,’ उनलाई उद्धृत गर्दै रोडोङ सिन्मून पत्रिकाले लेखेको छ।
