अस्ट्रेलियाका महान्यायाधिवक्ताद्वारा बलात्कार आरोप अस्वीकार
अस्ट्रेलियाका महान्यायाधिवक्ता क्रिस्टियन पोर्टरले आफूमाथि लागेको बलात्कारको आरोप अस्वीकार गरेका छन् । प्रधानमन्त्री स्कट मोरिसनलाई गत हप्ता पठाइएको एक पत्रमा उनले एक १६ वर्षीय किशोरीलाई सन् १९८८ मा बलात्कार गरेको आरोप लगाइएको थियो ।
ती महिलाले गत वर्ष आत्महत्या गरेकी थिइन् । न्यू साउथ वेल्स प्रहरीले यसबारेको अनुसन्धान पूरा गरेको जनाएको छ । प्रधानमन्त्री मोरिसनले यसअघि पोर्टरलाई पदबाट बर्खास्त गरिनुपर्ने माग अस्वीकार गरेका थिए । ५० वर्षीय पोर्टरले भनेका थिए, ‘दावी गरिएको त्यो घटना भएको थिएन।’