राजकुमार ह्यारीलाई महारानीको समर्थन
लण्डन । बेलायतकी महारानी एलिजाबेथ द्वितीयाले आफ्ना नाति राजकुमार ह्यारीको शाही पदवी छाड्ने घोषणालाई साथ दिएकी छन् । ह्यारीले शाही परिवारको भूमिकाबाट अलग भएर आफ्नी पत्नी मेगनसँग स्वतन्त्र रुपमा क्यानडा र बेलायतमा रहने घोषणा गरेका थिए ।
त्यसबारेमा निर्णय गर्न बेलायती महारानीले सोमबार परिवारका सदस्यहरुसँग बैठक डाकेकी थिइन् । बेलायतकी महारानीले ह्यारी र उनकी पत्नी मेगनको इच्छामा समर्थन जनाउँदै उनीहरु शाही परिवारको पूर्णकालीन सदस्यको रुपमा भने रहिरहनु राम्रो हुने बताएकी छन् ।
उनले आगामी दिनमा यसबारेमा अन्तिम फैसला लिइने अपेक्षासमेत गरेकी छन् । गत बुधबारको एक अप्रत्यासित वक्तव्यमा राजकुमार ह्यारीले शाही परिवारबाट अलग भएर स्वतन्त्र रुपमा रहने बताएका थिए ।
उनको यो घोषणापछि शाही परिवारका वरिष्ठ सदस्यको बैठक सोमबार भएको हो । बैठकमा प्रिन्स अफ वेल्स अर्थात् ह्यारीका बाबु प्रिन्स चाल्र्स र ड्युक अफ क्याम्ब्रिज अर्थात ह्यारीका दाजु प्रिन्स विलियम पनि सामेल थिए । बैठक निकै सकारात्मक रहेको राजदरबारको वक्तव्यमा जनाइएको छ ।
